Ніва № 42 (2475), 19 кастрычніка 2003 г.

Казначэйскі аддзел у Гайнаўцы

Аляксей МАРОЗ

Намеснік міністра фінансаў Веслаў Цясельскі 6 кастрычніка ў Гайнаўскім беларускім музеі паінфармаваў аб рашэнні адкрыць у Гайнаўцы казначэйскі фінаддзел. Чыноўнікі Міністэрства фінансаў плануюць яшчэ ў гэтым годзе купіць офісныя памяшканні і з 1 студзеня 2004 года адкрыць казначэйскую ўстанову. Зараз самым надзейным месцам для фінаддзела з’яўляюцца пакоі аднаго з банкаў, бо не патрабуюць рамонтаў. Гайнаўскі фінаддзел будзе абслугоўваць падаткаплацельшчыкаў з усяго Гайнаўскага павета, а кантроль за прадпрыемствамі і прыватнымі асобамі надалей ажыццяўляць будзе Бельская казначэйская ўстанова. У новым аддзеле знойдуць працу жыхары Гайнаўкі і наваколля.

Віцэ-міністр Веслаў Цясельскі станоўча ацаніў працу казначэйскіх службаў. Эфектыўнасць іх работы ацаніў на 99,8%. На 6,5 тысячы судовых працэсаў казначэйская ўстанова прайграла толькі 129. У хуткім тэмпе пачалі разбудоўвацца кантрольныя службы, якія правяраюць прадпрыемствы і ліквідуюць ценевую эканоміку. Намаганні Міністэрства фінансаў будуць ісці ў напрамку паніжэння падаткаў і ліквідацыі льготаў.

Сабраныя пыталі, як міністэрства хоча затрымаць буйных падаткаплацельшчыкаў, якія пераносяццца ў іншыя краіны, і ці намерваецца аблажыць падаткам касцельную дзейнасць. Віцэ-міністр паінфармаваў, што з’яўляецца прыхільнікам падаткааблажэння касцельнай дзейнасці накшталт распараджэнняў, якія прымяняюцца ў заходніх краінах. Абараняў ён вялікіх плацельшчыкаў паясняючы, якія ў агульным сумленна плацяць падаткі.