Праграмна не бачыць нацыянальных меншасцей

Аляксей МАРОЗ

— Праграмна мы не бачым нацыянальных меншасцей. Яны для нас не існуюць. Я лічу, што ніякая дзейнасць меншасцей, ні сексуальных, ні нацыянальных, ні рэлігійных, ні філатэлістаў, не павінна быць фінансавана дзяржавай. Няхай меншасці самі фінансуюць сваю дзейнасць. Беларусы, як усе іншыя грамадзяне, будуць плаціць ніжэйшыя падаткі. Могуць купляць білеты на беларускія спектаклі і прэсу. Мы не павінны вырашаць, на што людзі павінны выдаткоўваць свае грошы, — заявіў для „Нівы” Януш Корвін-Мікэ.

Удзельнікамі перадвыбарчага мітынгу сталі людзі, якія прыйшлі зрабіць пакупкі на рынку і прадаўцы, што апынуліся ля ўвахода на базар. Некаторыя хвалілі выступаючых за крытыку ўлад. Многа жыхароў Гайнаўкі з расчараваннем глядзіць на дзейнасць урадавых колаў у апошнім дзесяцігоддзі. Унія рэальнай палітыкі можа разлічваць на падтрымку гайнаўскіх прадпрымальнікаў незадаволеных гаспадарчымі цяжкасцямі і высокімі падаткамі. Аднак палітыкі УРП не прадставілі канкрэтнай праграмы ў адносінах да нацыянальных меншасцей, каб здабыць прыхільнасць гайнаўскіх беларусаў.

— Да ўсіх грамадзян Польшчы трэба ставіцца аднолькава, без дадатковых правоў нацыянальным меншасцям. Беларус ні ў чым не лепшы і ні ў чым не горшы за паляка. Беларусы павінны мець магчымасць гэтак жа гуртавацца як і філатэлісты. Я дамагаюся, каб Польшча перастала дафінансоўваць польскую меншасць у Літве. Такая падтрымка шкодная, бо літоўская дзяржава будзе лічыць іх пятай калонай. Дзяржава павінна быць нейтральнай у справах нацыянальнасці, расы і веравызнання, — сказаў Януш Корвін-Мікэ.

Дырэктар Яўген Сачко сустрэў Януша Корвіна-Мікэ на калідоры Комплексу школ з дадатковым навучаннем беларускай мовы. Палітык шукаў суседняга агульнаадукацыйнага ліцэя і пры нагодзе спаткаўся з белліцэістамі. Сваю сустрэчу распачаў ад крытыкі карупцыі ў Польшчы.

— Восемдзесят працэнтаў нашых палітыкаў павінна сядзець у турме за карупцыю. Рэфармаванне Польшчы трэба пачаць з расправы над карупцыяй. Толькі прыватная ўласнасць ліквідуе яе, бо ўласнікі не будуць дзейнічаць на сваю шкоду, — сказаў Я. Корвін-Мікэ ў час сустрэчы з гайнаўскімі белліцэістамі і настаўнікамі. Крытыкаваў ён дзяржаўныя школы і публічную ахову здароўя. Даказваў, што ўсе праблемы вырашыць прыватная асвета і ахова здароўя. Тлумачыў, што звольненыя з пасад чыноўнікі пойдуць працаваць у школы і будуць засноўваць прыватныя прадпрыемствы, якія створаць новыя месцы працы. Не сказаў толькі як чыноўнікі здабудуць неабходную для педагагічнай працы адукацыю.

Януш Корвін-Мікэ сустрэўся таксама з вучнямі і настаўнікамі Комплексу школ з дадатковым навучаннем беларускай мовы ў Бельску-Падляшскім.