Ніва № 39 (2472), 28 верасня 2003 г.

Не паразумеліся

Аляксей МАРОЗ

Міністры замежных спраў Нямеччыны Ёшка Фішар і Польшчы Владзімеж Цімашэвіч, якія 12 і 13 верасня спаткаліся ў Белавежскай пушчы, не паразумеліся ў спрэчных пытаннях, якія апошнім часам узніклі ў польскіх і нямецкіх дачыненнях.

Кіраўнікі знешнепалітычных ведамстваў размаўлялі перш за ўсё аб праекце новай еўрапейскай канстытуцыі. Польскі ўрад не пагаджаецца са зменай працэдуры галасавання ў Радзе Еўропы, якая абмяжуе значэнне Польшчы ды іншых краін з меншай колькасцю насельніцтва, а выдатна ўзмоцніць буйныя дзяржавы — Нямеччыну, Францыю і Англію. Калі не ўступяць у сілу прапанаваныя ў новай канстытуцыі змены, Польшча ў Радзе Еўропы будзе распараджацца падобнай колькасцю галасоў як Нямеччына.

— Нам неабходна паразумецца ў справе еўрапейскай канстытуцыі, нават у апошнюю ноч да пашырэння Еўрасаюза на новую дзесятку краін. Інакш у Еўропе з дваццаці пяці дзяржаў узнікнуць праблемы, — сказаў Ёшка Фішар на прэс-канферэнцыі ў Белавежы.

— Мы не скрываем розніц, якія дзеляць польскіх і нямецкіх дыпламатаў у справе новай еўрасаюзнай канстытуцыі. На размовы будзе яшчэ час на міжурадавай канферэнцыі, а зараз абгрунтоўваем наша становішча, — заявіў Владзімеж Цімашэвіч.

Абодва міністры адмоўна паставіліся да ідэі стварэння Цэнтра супраць выгнанню, які займаўся б выгнанымі пасля вайны немцамі.

— Мы павінны мець на ўвазе ўсё, што будзе нагадваць нам аб ІІ сусветнай вайне. Трэба адназначна вызначыць віну нацыянальнага сацыялізму, які выклікаў другую сусветную вайну, за смерць і злачынствы, — сказаў Ёшка Фішар.

— Мы павінны зрабіць усё, каб ніхто не мяняў гістарычнай праўды. Калі б ініцыятыва стварэння Цэнтра супраць выгнанню рэалізавалася ў яе першапачатковым выглядзе, мела б гэта адмоўнае ўздзеянне на польска-нямецкія адносіны, — сказаў Владзімеж Цімашэвіч. Пацвердзіў ён, што разыходжанні паміж Нямеччынай і Польшчай наконт вайны ў Іраку не зніклі.

Міністры наведалі запаведнік зуброў, былі ў прыгожай Мікалаеўскай царкве ў Белавежы і схілілі галовы перад помнікам 90 асобам забітым гітлераўцамі ў 1942 годзе. Нямецкі госць наведаў прыватную леснічоўку Владзімежа Цімашэвіча пад Гайнаўкай і прыняў запрашэнне прыехаць на адпачынак у пушчу. Прытым ён патлумачыў, што ў час водпуску не займаецца палітыкай, а толькі сямейнымі справамі.