Пасольства гатова аказваць садзеянне

Па меры магчымасці, беларуская дзяржава імкнецца выдаваць творы беларускіх аўтараў, што жывуць за мяжой. Творы беларускіх пісьменнікаў Польшчы неаднаразова выходзілі асобнымі выданнямі, друкаваліся ў беларускіх літаратурна-мастацкіх часопісах і газетах.

Па выніках нядаўняга спаткання з членамі літаб’яднання „Белавежа” Г. Валкавыцкім і А. Анішэўскай, звярнуўся я да Міністэрства інфармацыі Беларусі з прапановай актывізаваць супрацоўніцтва з беларускімі пісьменнікамі Польшчы. Як паведамілі ў міністэрстве, рэдакцыйна-выдавецкая ўстанова „Літаратура і мастацтва”, у якую зараз уваходзяць часопісы „Нёман”, „Полымя”, „Крыніца”, „Сусветная літаратура”, „Маладосць” і газета „ЛіМ”, а таксама рэдакцыя газеты „Культура” выражаюць гатоўнасць працягваць вышэйзгаданую практыку і чакаюць новых твораў ад беларускіх аўтараў з Польшчы.

Пасольства гатова аказваць садзеянне ў перадачы твораў беларускіх пісьменнікаў для публікацыі ў Беларусі.

Разам з тым, як нам уяўляецца, адной з рэальных магчымасцей данесці мастацкае слова да шырокага кола чытачоў, у тым ліку і ў Беларусі, з’яўляецца ўдзел беларускіх пісьменнікаў Польшчы ў Рэспубліканскім конкурсе на лепшы літаратурна-мастацкі твор, які ў красавіку 2003 года аб’яўлены Міністэрствам інфармацыі Беларусі і выдавецтвам „Мастацкая літаратура”.

Лепшыя творы беларускіх пісьменнікаў і паэтаў па выніках конкурсу будуць выдавацца дзяржаўнымі выдавецтвамі Беларусі.

У дадатку дасылаю ўмовы Рэспубліканскага конкурсу з перакананнем, што гэтая прапанова зацікавіць беларускіх літаратараў Польшчы.

Павел ЛАТУШКА, Надзвычайны і Паўнамоцны Пасол Рэспублікі Беларусь у Польшчы