Ніва № 37 (2470), 14 верасня 2003 г.
Беларуская мова ў БеластокуГанна КАНДРАЦЮКЗ новага навучальнага года ў Беластоку вядзецца навучанне беларускай мовы ў гімназіі. Пакуль што, група навучэнцаў невялікая — 9 асоб. У большасці гэта выпускнікі ПШ н-р 4, ПШ н-р 11 і раней — польска-беларускага садка. Навучанне арганізавана бацькамі ў адной з самых лепшых школ горада, Гімназіі н-р 7 што па вуліцы Сталэчнай. Беларускую мову, як замежную, будзе вывучаць група гімназістаў у І „ц” класе.— Магчыма, што дойдуць яшчэ вучні з іншых класаў, — кажа настаўніца беларускай мовы Аліна Ваўранюк. У гімназіі шэсць першых класаў і 170 вучняў. Выхавацелька І „ц” класа — настаўніца польскай мовы Уршуля Штабэльская-Копа. Гэты І „ц” клас лічыцца элітарным. Сюды дабраныя гімназісты з самымі высокімі дасягненнямі ў вучобе. * * * Сёмы год запар вядзецца навучанне беларускай мовы ў ПШ н-р 4. Нашы навучэнцы заваявалі тут добрую славу і поспехі. Урокі вядуцца з першага па шосты клас. — У першы клас запісалася сем асоб, — кажа Аліна Ваўранюк, якая ад пачатку выкладае тут родную мову. Выхавацелька першага класа, дарэчы, ужо трэці раз — Ева Данэйка. Настаўніца, як першая ў гісторыі школы, вяла польска-беларускі клас — сённяшніх гімназістаў. — Буду далей весці праект „Гульня ў тэатр”, — адзначае Аліна Ваўранюк. — Будзем прымаць удзел у дэкламатарскім конкурсе „Роднае слова” і тэатральным аглядзе. Пяты і шосты клас будуць рыхтавацца да прадметнага конкурсу беларускай мовы. У ПШ н-р 4 да 60 навучэнцаў беларускай мове. У асноўным, гэта выпускнікі беларускага прадшколля. * * * На будынку Самаўрадавага прадшколля н-р 14 дзве табліцы: польская і беларуская. Беларуская — тарашкевіцай. — Новую табліцу падарыў нам пасол Рэспублікі Беларусь, — кажа Луцыя Неміровіч, дырэктарка садка. Справай табліцы пацікавілася асабіста жонка пасла, Наталля Латушка. Яна пазваніла дырэктар і сама прапанавала дапамогу. Раней, калі спадарства Латушкі працавалі ў Беластоку, у беларускі садок хадзіла іх дачка Яна. У час канікул быў праведзены капітальны рамонт будынка. Адноўлены дыдактычныя залы і кухня. У садку зараз свежа і калярова, у калідоры сухі басейн з мячыкамі. — Сярод спонсараў былі бацькі нашых выхаванкаў, — адзначае Луцыя Неміровіч. У гэты годзе самая рэкордная колькасць навучэнцаў — 46 дзетак. — Здаецца, што яшчэ будзе нас больш, — пані дырэктар не скрывае задавальнення. — Звоняць нам бацькі і дапытваюцца пра садзік. Пяць навучэнцаў даязджае з Засцянак і Грабоўкі (гміна Супрасль). Цікава, што інфармацыя пра беларускія аддзелы ідзе прыватным каналам: бацькі даведваюцца пра іх ад знаёмых, суседзяў, сваякоў. У беларускіх групах працуюць пяць настаўніц: Альжбета Рудчук, Данута Тымашэвіч, Ева Гняздоўская, Анна Бабік і дырэктарка прадшколля. У традыцыі прадшколля ўсталявалася мастацка-дыдактычная праграма „Ад народнасці да тоеснасці”. У тэатр, на этна-народным рэпертуары (у большасці напісаным бацькамі), гуляюць разам бацькі, настаўнікі і дзеткі. — У Беластоку хочацца працаваць, — кажа Аліна Ваўранюк, — бо тут заангажаваныя бацькі. У гэтым напрамку таксама добрая змена — большасць навучэнцаў са звычайных беластоцкіх сем’яў, якія не звязаны прафесійна з беларускай мовай.
|