Ніва № 36 (2469), 7 верасня 2003 г.

Трымайцеся праваслаўнай традыцыі

Аляксей МАРОЗ

Архіепіскап Афінаў і ўсёй Грэцыі Хрыстадул з 16 па 22 жніўня г.г. пабываў у Польшчы па запрашэнні мітрапаліта Савы. Прымаў ён удзел у богаслужэннях на Святой Гары Грабарцы, сустракаўся з дзяржаўнымі, царкоўнымі і самаўрадавымі ўладамі.

Спачатку грэчаскі першаіерарх маліўся ў варшаўскіх цэрквах св. Марыі Магдаліны і св. Іаана Лесвічніка, спаткаўся з прадстаўнікамі польскага ўрада. На Святой Гары Грабарцы ўдзельнічаў у святкаваннях Праабражэння Гасподняга. Пасля сустрэўся з беластоцкімі вернікамі ў Мікалаеўскім саборы, Свята-Духаўскай царкве і храме Агія Сафія. У Супрасльскім манастыры архіепіскап паабяцаў хадайнічаць за фінансавай дапамогай на адбудову Дабравешчанскай царквы.

У Свята-Троіцкім саборы ў Гайнаўцы госця віталі святары Гайнаўскага і Кляшчэлеўскага благачынняў, самаўрадавыя ўлады і вернікі. Гайнаўскі сабор захапляе візантыйскай архітэктурай і роспіссю ўсярэдзіне храма. Нашы іерархі паказалі грэцкаму госцю працу яго земляка, які некалькі гадоў прыязджаў у Гайнаўку і за невялікай аплатай выконваў сценныя фрэскі.

— У гэтым храме адчуваю духовую радасць, — сказаў архіепіскап Хрыстадул, гледзячы на распісаныя сцены сабора. — З нашай і вашай культурнай спадчыны ўзнікла еўрапейская цывілізацыя. Адбываецца яднанне Еўропы на эканамічным, сацыяльным і вайсковым фоне. Цешыць, што ўступаючыя ў Еўрасаюз краіны — хрысціянскія, а Кіпр і часткова Польшча — з праваслаўнымі вернікамі. Калі чарговымі членамі Еўрасаюза cтануць балканскія краіны, будзе яшчэ больш праваслаўных. Аднак не адным хлебам будзе жыць чалавек. Не эканоміка самая важная ў жыцці. Трымайцеся багатай праваслаўнай традыцыі, а зможаце супрацьстаяць цяжкасцям.

Архіепіскап перадаў праваслаўным вернікам блаславенства ад Грэчаскай царквы і народа ды ўручыў епіскапу Гайнаўскаму Мірану напрастольны крыж.

— Многія ў нас застаюцца без працы і мусяць клапаціцца каб здабыць хлеб. Вы гаворыце, што можа будзе лепш у Еўропе. Няхай здзейсняцца гэтыя словы, — заявіў епіскап Міран і перадаў госцю ікону Божай Маці.

Архіепіскап Хрыстадул наведаў яшчэ Яблачынскі манастыр, царкву ў Любліне і канцлагер у Майданку. На Хрысціянскай тэалагічнай акадэміі ў Варшаве атрымаў званне доктара honoris causa.

Архіепіскап Хрыстадул нарадзіўся ў 1939 годзе ў Грэцыі. У 1962 годзе атрымаў званне юрыдычнага магістра, у 1967 годзе — магістра тэалогіі, а пасля — доктара тэалогіі. Добра ведае французскую і англійскую мовы, размаўляе на італьянскай і нямецкай мовах. Архіепіскапам Афінаў і ўсёй Грэцыі з’яўляецца з 1998 года. Зараз Грэчаскую царкву складаюць Афінскае архіепіскапства і 80 мітраполіяў. У Грэцыі каля 11 мільёнаў вернікаў, амаль 7 тысяч храмаў і 200 манастыроў.