Спасаўскія запусты 2003

Паўліна ШАФРАН

Абрадавую частку, так званую „пэрэпэліцю”, прадставіў фальклорны гурт „Арэшкі” з Арэшкава. Жанчыны звязвалі ахапак недакошанага ў час жніва збожжа, якое потым упрыгожвалі кветкамі, а на зямлі, паміж каласкамі, клалі кавалачак хлеба для польнай жывёлы, што мела запэўніць ураджай на другі год і быць падзякай для „матулі зямлі” за збожжа — сімвал жыцця, даўгавечнасці. „Пэрэпэліці” спадарожнічалі народныя песні — жніўныя, любоўныя, аб роднай зямлі і шчасці.

Сярод гасцей Запустаў былі, між іншым, пасол РБ Павел Латушка з сям’ёй, консул Аляксандр Харытонаў і прадстаўнікі бельскіх улад. Публіка, аднак, не была так шматлюднай як спадзяваліся арганізатары. Прычынай гэтаму было незакончанае яшчэ жніво, бо, вядома, што большасць бяльшчан гэта вяскоўцы, і хаця надвор’е не зусім спрыяла працы ў полі (раніцай 10 жніўня выпаў дождж), раз’ехаліся яны па сваіх гаспадарках.

На сцэне выступілі „Васілёчкі” (рэкардсмены бельскай эстрады — існуюць ужо 39 гадоў) з такімі песнямі як „Ты чырвоная каліна”, „Ой развівайся дубе”, „Чарачка”. Потым бельскую публіку да танцаў заахвочвалі „Маланка”, мужчынскі хор „Куранты” і капэла „Эва Бэнд”. Гасцінна ў бельскім амфітэатры выступіў гурт „Сваякі” з Беларусі.

Спасаўскія запусты традыцыйна рыхтуюць жыхароў Бельска і наваколля да спасаўскага посту — „спасаўкі”, і як гаварыў адзін з арганізатараў „жонкі павінны дазволіць сваім мужам выпіць піва, з’есці каўбаску, паслухаць добрай музыкі, а потым, калі прыйдзе пост, востра трымаць у руках”. За такой парадай пайшлі амаль усе... І добра, бо і гульні былі, і танцы, а ўсё традыцыйна, як на Спасаўскіх запустах!