Фэст на фэст

Янка ЦЕЛУШЭЦКІ

Публіку прывітаў войт Нараўчанскай гміны Мікалай Павільч. Канцэрт вяла Кацярына Бяляўская з Гміннага асяродка культуры.

Была 17 гадзіна пасля поўдня. Мерапрыемства распачалося выступленнем „Цаглінак” са Старога Ляўкова. Выканалі яны шэсць песень, у тым ліку „Свеціт ясны месяц...”, „А ў гародзе ярыца”, „Кацілась, кацілась калода з печы” ды „Цякла рэчка пад масточкам”. Выступленне суправаджалася гарачымі апладысментамі.

За імі неспадзеўка. На сцэну выйшаў сяміасабовы жаночы калектыў з Семяноўкі, які заснавалі ўсяго два тыдні назад. З ім яго мастацкі кіраўнік Мікалай Мяжэнны з Гродна. Жанчыны спявалі песні „Колькі ў небе зор”, „А ў зялёным лесе” і „Пасеялі дзеўкі лён”.

„Нараўчанкі” праспявалі шэсць песень. Асабліва запомніліся „Ой, там у полі”, „Копаў, копаў крынічэньку”, „Гарэла сосна, палала” і „Я малада выйшла замуж”.

Усім спадабаўся маладзёжны мешаны вакальна-інструментальны калектыў „Лучына” з Беластока. Так выпадкова склалася, што апрача адной песні пра Яся, які ехаў на кані, усе іншыя пачыналіся ад „ой”: „Ой, у полі азярэчка”, „Ой, на гары два дубкі”, „Ой, на гары дождж ідзе” і „Ой, там каля рэчкі”. Выкананне іх было арыгінальнае, цікавае.

Гурты, па ўсяму відаць, упадабалі сабе назву „Лучына”. За беластоцкай на сцэну ўвайшла „Лучына” з Нараўкі. Дзяўчаты і хлопцы з Нараўчанскай гміны праспявалі, між іншым, песні „У суботу Янка ехаў ля ракі”, „О, Божа, магутны” і „Вяне рута ля прысадаў”. Выканаўчая манера маладых спевакоў выклікала зацікаўленне.

Пасля іх з семяноўскай сцэны пад адкрытым небам слухачы пачулі песні „Незабудак” з Курашава (Чыжоўская гміна). Спявалі яны „Як нам замужом жылосе”, „За горамі голубы літают”, „Крынічэньку” і „Частушкі”. Было што паслухаць.

У Семяноўку на фэст прыехаў замежны ансамбль „Грымата” з Беларусі. Прывёз ён з сабою вялікую колькасць беларускіх народных лірычных і жартоўных песень. Цудоўныя галасы, падмацаваныя акампанементам гармонікаў прывялі слухачоў у захапленне. А песні плылі і плылі са сцэны: „Ты грай гармонь”, „Добры хлопец ідзе”, „На вуліцы грымата”, „Гарманіст, гарманіст”, „Ой, у лузе пры даліне”, „Ой, каліна, ой маліна”, „Шыпшына” (беларуская „Смэрэко”), „А ў лесе грыбы зарадзілі”, „Ой, кума, ой кума”, „Пчолы”, „Ой, коцяцца два яблычкі”, „Чарка на пасашок”. Ірына Бурсевіч спявала сола „Гай зеляненькі” ды гарманісты віртуозна зайгралі „Слонімскую беларускую польку”. Артысты шчодра дарылі ўсім прысутным сустрэчу з цудоўным. У „Грыматы”, варта адзначыць, вельмі меладычная музыка, якая схіляе публіку спяваць і танцаваць.

Трохгадзінны канцэрт закончыўся выступленнем капэлы з Дубін. У яе рэпертуары вядомыя беларускія песні. На семяноўскім беларускім фэсце сабралася многа людзей. Гэта доказ таго, што імпрэза была патрэбная. Была гэта добрая нагода для папулярызацыі вясковых калектываў і іх аматарскай творчасці.

Калі кончыўся канцэрт, на двары было ўжо амаль цёмна. Арганізатары — улады гміны і БГКТ — запрапанавалі ўсім ахвотным танцавальную вечарыну ў святліцы. Да танцаў іграў калектыў „Аксель”.