Сяброўская бяседа

Міра ЛУКША

— Як гуляеце?! — дапытваецца са сцэны найбольш вядомы прымак Беласточчыны — дырэктар Гарадоцкага дома культуры Юрка Астапчук. Добра гуляюць! Пачаў „Расспяваны Гарадок”, далучыліся бельскія „Васілёчкі”, „Арэшкі” з Арэшкава, „Нараўчанкі” з Нараўкі (вядзе іх цяпер дубінец Пятро Скепка, які аднавіў таксама і „Дубіны”; яны таксама выступілі), „Чыжавяне” з Чыжоў, „Каліна” ды малады яе парастак „Калінка” з Залук, „Таневічанкі” з Тыневіч, новыя, мужчынскія „Куранты” з Бельска (пад рукою Аліны Кос), „Збучанкі” са Збуча, „Крыніца” з Беластока, „Рэчанька” з Козлік, ляўкоўскія „Цаглінкі”, арлянскія „Арляне”, „Журавінкі” з Агароднічак, маладыя беластоцкія „Каласкі”, „Незабудкі” з Курашава, „Хутар” з Гарадка, гайнаўскі хор, „Красуні” з Краснага Сяла, ну, і з Беларусі „Шкляры” з Бярозаўкі (прывезлі яны падарунак — агромны крышталёвы келіх, каб было ў ім багата ўсяго) ды растанцаванае, расспяванае „Стрэчанне” з Мазыра. Былі таксама маладзенькія палякі — „Клекацякі” з Боцькаў, якія прыгожа танцавалі падляшскія польскія танцы. А перш за ўсё рэй вадзілі „Прымакі” — гаспадары з нястомным Юркам. Яны і гралі далёка ноччу, бо народ хацеў гуляць ды цешыцца далей. Гэта ўжо было пасля канцэрта і ашаламляльнага паказу феерверкаў, якія ўзляталі тысячамі каляровых зорак над аўсяным полем на ўзлеску Барыку.

Народ сабраўся і вясковы, з акалічных мясцовасцей Гарадоччыны, былі і гайнавяне, і беластачане, і галандцы. „Smereke” teraz!, „Судзьбу!” — патрабавалі найбольшых падляшскіх гітаў слухачы. Сярод жаданых гасцей — сам пасол Беларусі Павел Латушка з жонкай Наталляй, консул Аляксандр Карачун. Прысутнічалі і святары праваслаўны ды каталіцкі, прадстаўнікі арміі ды палітыкі. Прывітанне ад падляшскага маршалка перадаў Ян Сычэўскі, старшыня БГКТ і член кіраўніцтва падляшскага самаўрада.

„Сяброўская бяседа” гэта прамоцыя таксама і Гарадоцкай гміны. На расстаўленых пад соснамі століках можна было пацікавіцца і часопісам „Гарадоцкія навіны” (гэта цяпер мутацыя гміннай „Tutaj”), набыць паштоўкі, агратурыстычныя карты Гарадоцкай ды Міхалоўскай гмін. Варта паказваць свае добрыя якасці, асацыявацца і сваім, і гасцям тым, што ў нас самае файнае.