Канцэрт меншасцей

Янка ЦЕЛУШЭЦКІ

Сёлета падчас Фестывалю можна было паслухаць не толькі фальклорныя калектывы, але і сучасныя эстрадныя. Выступілі таксама танцавальныя маладзёжныя і дзіцячыя гурты з Гродна, Ваўкавыска і Гайнаўкі.

Фестываль адкрылі старшыня Галоўнага праўлення БГКТ Ян Сычэўскі і прадстаўніца Саюза палякаў Беларусі Аксана Галамбоўская. Яны адзначылі неабходнасць такіх сустрэч, што яны прыбліжаюць меншасці да сябе ды вядуць да лепшага ўзаемапазнання. Я. Сычэўскі і А. Галамбоўская прывіталі гасцей, між іншым, консула Рэспублікі Беларусь у Беластоку Аляксандра Карачуна, прадстаўніка Міністэрства культуры Беларусі Тадэвуша Стружэцкага, старшыню Падляшскага самаўрадавага сейміка Збігнева Кшывіцкага, падляшскага куратара асветы Зофію Транцыгер-Кочук і прадстаўніцу Аддзела культуры Гарадскога ўпраўлення ў Гродне Людмілу Кадзевіч.

Канцэрт вялі Марыя Казлоўская і Арэк Якімюк. Першым выступіў хор „Крыніца” з Беластока. У яго выкананні былі дзве песні — „О, Беларусь, ты край наш вечны” ды „Там на лужку, на лужку”, — якімі гурт запаланіў публіку. Добра зарэкамендавалі сябе „Цаглінкі” са Старога Ляўкова. Адметна выканалі песню „Усходзіць ясны месяц ды светлая зара”. „Расспяваны Гарадок” з Гарадка прывёз з сабою песні „Добры дзень, шаноўныя людзі” ды „Ой, павяду я коніка паіць”. А ўжо вялікую прыхільнасць заваявалі эстрадныя гурты „Лідэр” з Беластока (спявалі песні „Не капайце крынічэньку”, „Пчолы”, „За даламі вёсачка”) і „Прымакі” з Гарадка („Як забава, то забава”, „Дуб зялёны”). Запомніліся калектывы: „Маланка” і „Васілёчкі” з Бельска-Падляшскага, „Лучына” з Беластока і хор Гайнаўскага дома культуры.

Зоркай канцэрта быў народны хор „Родніца” з Мінска. Задушэўна выконваў ён песні „Шумяць вербы, што я пасадзіла”, „Ой, там у садзе, садзе-садочку”, „Кавалёк, кавалёк-кавалёчак” і песню пра чарнявую дзяўчыну.

Польскія песні мілагучна і з вялікім пачуццём спявалі калектывы з Гродзеншчыны, між іншым, „Вішанька” з Путрышкоўскага дома культуры, вакальная група са Струбніцкага дома культуры, „Анджэліка” з Ліды, „Шкляры” з Бярозаўкі, „Польскія кветкі” з Астравецкага раёна і „Іўянка” з Іўя.

Адным словам, было чым душу парадаваць. Канцэрт закончыўся польскай песняй „Piekna nasza Polska cala” і беларускай „Люблю наш край” у выкананні ўсіх удзельнікаў фестывалю. Людзі выходзілі з мерапрыемства пад вялікім уражаннем. У час канцэрта адбываўся кірмаш кніжак і рукадзелля народных умельцаў.

Фестываль быў увянчэннем двухдзённай (18 і 19 ліпеня) Міжнароднай навуковай канферэнцыі „Шлях да ўзаемнасці”.