Недавер да Еўрасаюза

Аляксей МАРОЗ

У рабочы дзень на вуліцы ў Чыжах сустракаю, у асноўным, старэйшыя асобы. Мужчына, які просіць назваць яго Васілём, кажа, што галасаваў супраць уступлення Польшчы ў Еўрасаюз.

— Напэўна ў Еўрасаюзе не будзе лепш. Кожны хоча многа, а яго няма. Будзе яшчэ большы непарадак, чым цяпер, — кажа спадар Васіль.

Ян Ахрымюк, які спявае ў калектыве „Чыжавяне”, адмоўна ацэньвае перамены, якія адбыліся ў нашай і суседніх краінах. Не прыняў удзелу ў рэферэндуме, бо не верыць у яго станоўчыя рэзультаты.

— За чым жа я меў галасаваць? Да чаго ж давялі зараз вёску. На 200 дамоў у Чыжах засталося можа 10 маладых гаспадароў. Невядома, што будзе далей, бо людзі жывуць з дня на дзень, — кажа Ян Ахрымюк.

— Пры камуне людзі жылі добра і калі б так далей было, то маладыя людзі заставаліся б гаспадарыць, — заяўляе жонка Яна Ахрымюка. — У нас сын застаўся на гаспадарцы, але цяжка яму будзе. Аборы ў нас няма і хіба ад 2004 года перастануць прымаць нашае малако (няма ўмоў для даення, якія патрабуюцца ў Еўрасаюзе — А. М.). Пры камуне многія гаспадары будавалі дамы, аборы, клуні, куплялі сельскагаспадарчыя машыны, а зараз даход з сельскагаспадарчай прадукцыі вельмі малы і цяжка разбудоўваць гаспадарку.

На лавачцы каля свайго дома сядзіць мужчына, жанчына корпаецца ў агародчыку.

— Я супраць галасаваў, бо праўды ў нас няма. Лічу, што ў Еўрасаюзе яшчэ горш будзе. Калі малако купляюць па 50 грошай, а ў магазіне прадаюць больш за залатоўку, то як можа быць лепш, — тлумачыць пажылы мужчына. Жанчына ўчуўшы пра палітыку, пачынае крытыкаваць урад і жаліцца, што атрымлівае толькі 500 злотых пенсіі.

Трыццаціпяцігадовы мужчына, якога спатыкаю на вуліцы заяўляе, што таксама галасаваў супраць уваходу Польшчы ў Еўрасаюз.

— У чым жа мне гэты Еўрасаюз дапаможа. Абрэзваюць даплаты да збожжа, а калі Польшча ўвойдзе ў Еўрасаюз можа быць яшчэ цяжэй з яго продажам. Тыя, якія зараз канчаюць школу, можа і дачакаюцца лепшага жыцця, але старэйшым цяжка будзе, — кажа мужчына.

На панадворку солтыса Андрэя Тыханюка сустракаю жанчыну, якая прывезла на продаж трускалкі. Заяўляе, што галасавала за ўступленне Польшчы ў Еўрасаюз. Хаця яна не перакананая, што ў Еўрасаюзе палепшае доля жыхароў вёскі, то мае надзею, што будзе лепш жыць яе дзецям, якія жывуць у Беластоку і Гайнаўцы. Солтыс Андрэй Тыханюк наракае, што сёлета слабы ўраджай трускалак. Скупіў толькі 30 кілаграмаў і не спадзяецца на скупку большую за 200 кілаграмаў. Цана, 4 злоты за кілаграм, большая за мінулагоднюю. Аднак, не дае такога даходу, які быў раней. Спадарства Тыханюкі куплялі тады ў сезоне па 1 800 кілаграмаў. Калі Андрэй Тыханюк канчае купляць трускалкі стаўлю пытанне пра рэферэндум.

— Я галасаваў супраць уступлення Польшчы ў Еўрасаюз, бо ўсё ў ім мне не падабаецца. Калі ўступім у Еўрасаюз дык на нашай вёсцы на 100% будзе горш. Абмяжуюць скупку малака і збожжа, на якое цана можа панізіцца. Нашым малочным кааператывам цяжка будзе прадаваць сваё малако ў Еўрасаюзе, а з іншых краін будуць пхаць нам сваё малако. Не думаю таксама, што ў горадзе будзе лепш, калі ў Францыі ці Нямеччыне такое вялікае беспрацоўе, — рашуча заяўляе Андрэй Тыханюк і пераходзіць да штодзённых праблемаў. Інфармуе, што пасля асенняй засухі і зімовых марозаў будзе слабы ўраджай на азімае збожжа. У Чыжах каля 40% азімай пшаніцы і пад 80% рапсу зааралі, бо высахлі яны і вымерзлі. Войт Чыжоўскай гміны Юрый Васілюк, якога наведваю перад канцом рабочага дня, паясняе, што слабое зацікаўленне рэферэндумам было таксама ў суседніх гмінах Гайнаўскага павета.

— Старэйшыя асобы менш зацікаўлены зменамі ў нашай краіне і з недаверам глядзяць на Еўрасаюз. За ўваход у еўрапейскія структуры найчасцей галасавалі людзі маладыя, — заяўляе войт.