Узнагароды найлепшым

Аляксей МАРОЗ

Мерапрыемства адкрыў дырэктар Яўген Сачко, які ў выступленні адклікаўся да ідэй інтэграцыі з Еўрасаюзам. Сёлетні навучальны год прынёс новыя еўрапейскія перспектывы, якія патрабуюць добра вучыцца і працаваць для супольнага еўрапейскага дабра і супольнай будучыні.

— Мы, беларусы, уносім у Еўрасаюз патрыятызм, нашую культуру і пашану для зямлі. Будзем намагацца захаваць у Еўропе нацыянальную тоеснасць, — заявіў дырэктар Яўген Сачко. Выпускнікам белгімназіі прапанаваў застацца на трохгадовую вучобу ў белліцэі.

Сабраных белліцэістаў сардэчна віталі ўпаўнаважаны Управы Амт-Гатштэт па справах супрацоўніцтва з Гайнаўскім паветам Эгон Швільгін і бурмістр Гатштэта Карэн Гансен. Эгон Швільгін выказаў сваю радасць ад станоўчых рэзультатаў праведзенага ў Польшчы еўрасаюзнага рэферэндуму і ўручыў дырэктару Яўгену Сачко сцяг Еўрасаюза. Сказаў ён, што жыхароў Польшчы чакае многа новых задач. Паінфармаваў, што ў саюзе шасці гмін Амт-Гатштэт жыве дацкая меншасць (пры мяжы з Даніяй) і ўлады саюза рашаюць праблемы гэтай нацыянальнай меншасці. Улады Саюза Амт-Гатштэт рашыліся ўзнагародзіць трое вучняў з Гайнаўскага павета, якія вылучыліся працай у карысць іншых людзей. Сталі імі белліцэісты Наталля Зофія Лемеш, Агнешка Пуц і Юстына Грыцюк. Усе яны вылучаюцца поспехамі ў вучобе. Наталля Зофія Лемеш узнагароджана была за культурна-грамадскую працу ў карысць беларускай нацыянальнай меншасці. Заўважаны былі яе дасягненні ў арганізацыі і вядзенні беларускіх мерапрыемстваў і супрацоўніцтва з тыднёвікам „Ніва”. Агнешка Пуц і Юстына Грыцюк атрымалі ўзнагароды за актыўную дзейнасць у карысць моладзі ў Брацтве праваслаўнай моладзі (Юстына Грыцюк былая, а Агнешка Пуц сённяшняя старшыня брацтва) і за валанцёрскую працу ў Доме міласэрнасці „Самаранін”.

— Мы рады, што можам вылучыць тры вучаніцы, якія памагаюць іншым. Вы атрымалі ўзнагароды за вашае чалавецтва, — сказаў Эгон Швільгін, уручыўшы вучаніцам вылучэнні. Спартсменам перадаў ён мячы і спартыўныя прылады ды запрасіў белліцэістаў на спартыўныя спаборніцтвы ў нямецкую школу. Прапанову настаўнікі і вучні прынялі з радасцю.

— Узнагарода была для мяне неспадзеўкай, але паказвае, што заўважылі маю работу. Атрымаўшы гэтую ўзнагароду бачу, што іду ў добрым напрамку, — заявіла Зося Лемеш.

У час падвядзення вынікаў вучобы аказалася, што самых лепшых поспехаў дабіліся вучні І „а” класа белгімназіі, у якіх сярэдняя ацэнка атрымалася на ўзроўні 4,42. Сярод ліцэістаў найлепш вучыліся вучні І „б” класа, якія дабіліся сярэдняй ацэнкі 4,27. Ва ўсіх белгімназістаў атрымалася сярэдняя ацэнка 4,07, а ў белліцэістаў — каля 4. Найлепшыя вучні атрымалі з рук дырэктара Яўгена Сачко пасведчанні з бела-чырвонай палоскай і кніжныя ўзнагароды. Узнагароды атрымалі таксама асобы, якія дзейнічалі ў школьным самаўрадзе, рэдакцыйным калектыве „Слоўца”, прадметных гуртках і перамагалі ў конкурсах. Дырэктар уручыў узнагароды членам гімназічнага музычнага калектыву і „Знічкі”. Стыпендыю прэм’ер-міністра Лешка Мілера атрымала вучаніца І „а” класа Іаанна Врублеўская, у якой сярэдняя ацэнка па вучобе — 4,96. У гэтым годзе заняла яна першае месца ў Алімпіядзе па беларускай мове і дайшла да ваяводскіх элімінацый Алімпіяды па польскай мове. Дзейнічае яна ў Ваяводскім маладзёжным парламенце.

Пасля ўрачыстага развітання са школай вучні спаткаліся з выхавацелямі і атрымалі пасведчанні. У гэтым навучальным годзе ўсе вучні паспяхова закончылі адукацыю і былі пераведзены ў вышэйшыя класы. Можна спадзявацца, што пасля візіту нямецкай дэлегацыі наладзіцца супрацоўніцтва паміж моладдзю абедзвюх краін.