Падлічылі нас

Аляксандр ВЯРБІЦКІ

Насельніцтва Польшчы ў 2002 годзе налічвала 38 230,1 тысячы чалавек, а гэта на 351 тысячу больш, чым паказаў папярэдні перапіс з 1988 года. З гэтага ліку прыналежнасць да польскай нацыянальнасці вызначыла 36 983,7 тысячы (96,74%), да іншай чым польская — 471,5 тысячы (1,23%) і зусім не назвала сваёй нацыянальнасці 774,9 тысячы чалавек (2,03%). З меншасцей найбольш назвала сябе сілезцамі (173,2 тыс.) і немцамі (152,9 тыс.). Да беларускай нацыянальнасці прызналася 48,7 тыс. чалавек. Іншыя нацыянальнасці: украінцы — 31,0 тыс., ромы — 12,9 тыс., расейцы — 6,1 тыс., лэмкі — 5,9 тыс., літоўцы — 5,8 тыс., кашубы — 5,1 тыс.; паўтысячы назвала сябе татарамі. У 4,5 тысячы выпадкаў асоб з няпольскай нацыянальнасцю нельга было ўстанавіць іхнюю. Найбольш асоб з іншай, чым польская, нацыянальнасцю пражывае ў Сілезскім (186,3 тысячы — 3,9% насельніцтва ваяводства), Апольскім (133,3 тысячы — 12,5%) і Падляшскім (55,2 тысячы — 4,6%) ваяводствах. У сямейных размовах мовай іншай чым польская карыстаецца 563,5 тысячы чалавек, з чаго нямецкай мовай 204,6 тысячы і англійскай 89,9 тысячы. Пра іншыя мовы рапарт не згадвае.

З 775,3 тысячы асоб народжаных па-за межамі сённяшняй Польшчы 104,5 тысячы нарадзілася на тэрыторыі сённяшняй Беларусі; найбольш іх (17,8 тысячы) пражывае ў Ніжнесілезскім ваяводстве, у Падляшскім — 5,3 тысячы.

У Падляшскім ваяводстве пражывала 1 208,6 тысячы чалавек; з іх ліку 591,2 тысячы мужчын і 617,4 тысячы жанчын. На вёсцы ў нашым ваяводстве жыло 251,3 тысячы мужчын і 245,7 тысячы жанчын — гэта дае найгоршы каэфіцыент у краіне. У Падляшскім ваяводстве найбольшы ў краіне адсотак людзей без пачатковай адукацыі — 6,5%.

У 1988 годзе ў Падляшскім ваяводстве з працы жыло 47,1% насельніцтва, а з пенсій і засілкаў 17,1%; у 2002 годзе з працы ўтрымоўвалася ў нас 33,5% насельніцтва, а з незаробкавых крыніц — 26,6%. Падобныя прапорцыі наглядаюцца па ўсёй краіне.