Свята беларускай культуры ў Беластоку

Янка ЦЕЛУШЭЦКІ

— Вялікая ахвота самадзейнікаў з нашых гарадоў і вёсак да спеву і да ўдзелу ў канцэртах будзе відавочна шаноўнай публіцы і сёння, — сказаў Ян Сычэўскі. — І гэта павінна нас толькі цешыць. Мы маем што паказаць. У нас многа калектываў, у тым ліку фальклорных, тэатральных, абрадавых. У іх выступае моладзь і старэйшыя. Кожны мае магчымасць развіваць свой талент. Сёння мы запрасілі 35 салістаў, калектываў і хораў. Будуць таксама салісты, аркестр і хор з Гродна.

Старшыня ГП прывітаў дастойных гасцей Свята беларускай культуры, між іншым, пасла Рэспублікі Беларусь у Варшаве Паўла Латушку, сенатара РП Сяргея Плеву, паслоў Сейма Аляксандра Чужа і Яўгена Чыквіна, падляшскага віцэ-ваяводу Ежы Паўяновіча, прадстаўнікоў гарадскіх улад Гродна і Беластока.

Канцэрт распачаўся ад выступлення калектыву „Журавінка” з Пачатковай школы н-р 3 у Бельску-Падляшскім. Затым на сцэну выходзілі лаўрэаты сёлетняга школьнага конкурсу „Беларуская песня” салісткі Агата Гаўрылюк з ПШ н-р 6 у Беластоку і Амелія Горбач з Гімназіі з дадатковым навучаннем беларускай мовы ў Гайнаўцы. Пасля за салісткамі зноў вучнёўскі калектыў — гімназісты з Ягуштова каля Бельска-Падляшскага, „Рамонка” з Ласінкі і „Дзявочыя ноткі” з Бельскага белліцэя.

Далей ужо да канца канцэрта сцэнай завалодалі дарослыя: эстрадныя гурты „Сакрэт” з Міхалова, „Ас” і „Лідэр” з Беластока ды „Прымакі” з Гарадка. „Лідэр” і „Прымакі” былі вымушаны выступаць на біс. Публіка ўпадабала іх музыку і выканаўчую манеру, не адпускала са сцэны.

Каму ж не хацелася паслухаць раз і яшчэ разок песень у выкананні „Рэчанькі” з Козлікаў, „Васілёчкаў” з Бельска-Падляшскага, „Расспяванага Гарадка” з Гарадка, „Лучыны”, „Крыніцы” і „Каласкоў” з Беластока. Маюць сваіх паклоннікаў „Арэшкі” з Арэшкава, „Каліна” з Залук, „Тыневічанкі” з Тыневічаў-Вялікіх, „Чыжавяне” з Чыжоў, „Збучанкі” са Збуча, „Красуні” з Краснага Сяла, „Журавінкі” з Агароднічкаў і „Цаглінкі” са Старога Ляўкова. Напэўна доўга будуць помніць слухачы песні ў выкананні хору Гайнаўскага дома культуры і пачаткоўца на музычнай ніве — мужчынскага калектыву „Куранты” з Бельска-Падляшскага пад мастацкім кіраўніцтвам Аліны Кос.

Варта адзначыць, што амаль усе калектывы выступілі ў народных касцюмах. І ўсе фарсіста, шыкоўна. Шматлікія з гуртоў увялі ў свой песенны рэпертуар яшчэ і харэаграфічныя элементы.

Канцэрт працягваўся больш за тры гадзіны. У тым часе сыпнуў дожджык, але публіка не панікавала, не пакінула сваіх месц на лавачках у беластоцкім гарадскім амфітэатры. Усе чакалі выступлення хору „Акварэлі” ды духавога аркестра з салістамі з Гродна. І пачулі песні ў выкананні акадэмічнага хора, з вялікай падрыхтаванасцю і дакладнасцю да апошняга гуку. Дырыжыравала ім Марына Петухова.

Аркестра гродзенскіх пажарнікаў слухаў я пару гадоў таму ў Войшках, дзе здавалі якраз у карыстанне дэпо. Кіраўнік яго Вячаслаў Матук. У Беластоку пад яго акампанемент спявалі салісты, сярод іх Марына Шапавал. Выступілі салісты-трубачы. Ад выступлення аркестра што ні кажы самыя добрыя ўражанні. Быў гэта моцны развітальны акорд канцэрта.

На заканчэнне ўсе выканаўцы праспявалі пад дырыжорствам Алы Каменскай песню „Люблю наш край”.

А за сцэнай збіраліся дадому беластоцкія літаратары „белавежцы”, якія падчас Свята падпісвалі свае кніжкі. Між іншым Міра Лукша давала аўтограф у сваіх „Wierszach tutejszych”. Складалі, не распраданыя да апошняга, свае вырабы гродзенскія і беластоцкія народныя рукадзельнікі. Шмат касет прадалі „Прымакі” з Гарадка. Проста з самахода, якім прыехалі і якога не ўкралі, аб чым апавясцілі са сцэны публіцы.