Яны яшчэ здзівяцца

Сустрэўся ён у Драмтэатры імя Аляксандра Вянгеркі з падляшскімі дзеячамі культуры ў рамках перадуваходнай выбарнай кампаніі некалькіх членаў урада. Акцёры тэатра прывіталі яго песнямі з пастановак. Міністр прызнаўся, што апошні раз быў у Беластоку ў палове сямідзесятых. Таму, мабыць, здзівіла яго, што палац Браніцкіх усё сядзіба вучэльні — Медыцынскай акадэміі, а павінен, як пераконваў, быць звязаны з „турыстычнай прамысловасцю”.

— Трэба зразумець узаемазалежнасць паміж помнікамі старажытнасці і турызмам.

Падкрэсліў неабходнасць падрыхтоўкі менеджэраў культуры, якія спраўна ўмелі б хадайнічаць у справе еўрасаюзных грошай, якімі, галоўным чынам, распараджаюцца кіруючыя камітэты ў рэгіёнах.

Падкрэсліў таксама:

— Сэнс еўрапейскай інтэграцыі — у разуменні разнароднасці.

Дэпутат Яўген Чыквін звярнуў увагу на тое, што часта разнароднасць заўважаецца ў Беластоку як чужародны элемент, а нават варожы. Можна пачуць: „Гэта добра, што беларусы асімілююцца”. Як жалюгодны прыклад пастаянных спораў, падаў манастырскі комплекс у Супраслі (апошнія сваркі за манастырскія катакомбы). З жалем успамінаў, што не запрашаецца ў Беласток Тэатр імя Я. Купалы з Мінска.

— Патрэбны імпульс звонку, таксама адукацыйны, каб бачыўся ў разнароднасці шанц, а не пагроза, — пераконваў дэпутат Чыквін.

Міністр Дамброўскі адказаў:

— Хто ведае, ці ў нашай частцы Еўропы беларусы — не найбольш спакутаваны народ. У адносінах да Беларусі ў нас абавязацельствы не толькі гістарычныя. Дапамога гэта адна з еўрапейскіх мер, так як і пашана для меншасці і адрознасці.

Прытым дадаў:

— Тое, што хтосьці беларус, не абазначае, што ён благі грамадзянін. Адрознасць гэта ўзбагачэнне, як кажа рымскі папа. Але, на жаль, „яны” таго, як і іншых слоў, не разумеюць. Такому нахабству інтэлігенцыя не можа паддацца.

І зажартаваў, спасылаючыся на шматкультурнасць і шматнацыянальнасць Польшчы:

— У Еўрасаюзе не ведаюць, каго прымаюць. Яшчэ яны здзівяцца.

Вальдэмар Дамброўскі заявіў, што ў наступным годзе зноў будзе 30 стыпендый таленавітай моладзі з Беларусі і Украіны:

— Справа ў тым, каб пабудаваць мост праз найбольш адкрытую думку і талент. Не можам казаць: талент беларускі, украінскі, польскі. Усе ў гэтай меры — патэнцыял свету.

На завяршэнне сустрэчы міністр культуры ад падляшскага маршалка Януша Кшыжэўскага і старшыні сейміка Збігнева Кшывіцкага атрымаў альбом Віктара Волкава і Анджэя Струмілы, а ад беластоцкага тэатра — плецены кошык з хатнімі вырабамі.

(холм)