Ніва № 23 (2456), 8 чэрвеня 2003 г.

Шырокія магчымасці для Арэшкава

Міхал МІНЦЭВІЧ

13 мая г.г. у Пачатковай школе ў Арэшкаве адбылося ўрачыстае адкрыццё камп’ютэрна-інтэрнэтавага кабінета. Установа атрымала шэсць камп’ютэраў фундаваных фірмай „Alcatel” і прызначаных школе прэзідэнтам РП. Ва ўрачыстасці прынялі ўдзел прадстаўнікі Канцылярыі прэзідэнта, Кураторыі, спонсара, Гміннай управы і школ з Гайнаўскай гміны ды некаторыя бацькі. Пасля выступленняў паасобных гасцей і разразання стужкі адбылося набажэнства і мастацкая частка на польскай і беларускай мовах.

Для ўрачыстасці школа ў Арэшкаве была святочна прыбрана. Калідор на другім паверсе быў аздоблены хмаркамі і ластаўкамі, а на першым паверсе былі звіты вярбовыя гнёзды з парай буслоў пры кожным. Упрыгожанне прыдумалі настаўніцы Генрыка Бліхаж і Бажэна Давідзюк, а ў яго выкананні ўдзельнічалі дзеці.

Урачыстасць у гімнастычнай зале адкрыла дырэктар школы Гражына Бэрэзняк, сардэчна вітаючы гасцей, якіх папрасіла ўзяць голас.

Міхал Чога, саветнік у Канцылярыі прэзідэнта, зачытаў ліст да настаўнікаў і вучняў Пачатковай школы ў Арэшкаве, у якім прэзідэнт Рэчы Паспалітай Аляксандр Кваснеўскі напісаў: „Я перакананы, што здадзены сёння ў карыстанне кабінет будзе поўнасцю выкарыстаны. Сёння камп’ютэры і Інтэрнэт адкрываюць шырокія магчымасці ўзаемасувязі, аблягчаюць здабыванне інфармацыі, дазваляюць развіваць зацікаўленні. Новы кабінет узбагаціць ваша навучанне, прыгатуе кожнага з вас да працы і жыцця, дзе карыстанне камп’ютэрам стала неабходнасцю. Жадаю, каб збыліся вашы мары і надзеі. Сардэчна віншую настаўнікаў. Хай камп’ютэрны кабінет добра вам служыць”.

Раман Садоўскі, прадстаўнік спонсара — фірмы „Alcatel”, падкрэсліў: „Варта кіравацца ў такія мясцовасці як Арэшкава, а візіт у гэтай школе пераконвае, што яе выбар быў слушны, бо камп’ютэры тут вельмі патрэбныя. Спадзяюся, што кабінет будзе служыць доўгія гады, а новыя магчымасці прыдадуцца вам у будучыні”.

Намесніца куратара падзякавала войту Гайнаўскай гміны Вользе Рыгаровіч за падгатоўку школы і настаўнікаў і за стварэнне ўмоў для перадачы каштоўнага абсталявання школе. Найбольшую падзяку скіравала яна Канцылярыі прэзідэнта і спонсару. Дзякуючы ім, — падкрэсліла, — малыя школы маюць шансы выпускаць мудрых людзей, якія ў будучыні змогуць нас падмяніць.

Войт Вольга Рыгаровіч сардэчна падзякавала прэзідэнту і яго саветніку: „Дзякуем, што дацанілі нас, убачылі нашу вёсачку на ўскраіне пушчы, нашу невялікую школку. Мы вельмі рады, што ў Польшчы ёсць яшчэ такія шляхетныя людзі, бо пачуць можна, што з прагрэсам убывае высакароднасць. Дацэньваем, што бачыць нас Варшава, і я гарантую, што гэтыя камп’ютэры будзем берагчы як зрэнку вока. Я прыкладу ўсе намаганні, каб дзеці імі поўнасцю карысталіся”.

Дырэктар Гражына Бэрэзняк падзякавала за ветлівыя словы і папрасіла разрэзаць стужку. Пасля гэтага акта арэшкаўскі настаяцель Лявон Анхім адслужыў малебен у суправаджэнні школьнага хору пад рэгентурай Бэаты Маркевіч.

Мастацкую частку вучні нарыхтавалі пад кіраўніцтвам дырэктар Гражыны Бэрэзняк. Вялі мерапрыемства Паўліна Чурак і Кацярына Дунда з VI класа ды Марцін Мішчук з V класа. Магдаліна Дэмянюк і Маргарыта Анхім з нулявога класа праспявалі па песенцы. Трэцякласнік Пётр Герасімюк захапляльна прадэкламаваў верш Віктара Шведа „Не думай ніколі, што ўмееш даволі”. Мастацкую частку закончылі вучні ІІ і ІІІ класаў танцам горцаў „Траяк”.

Урачыстасць у Арэшкаве была выдатна падрыхтавана і прайшла ўзнёсла. Было відаць, што дырэктар Гражына Бэрэзняк уклала ў гэта многа сваёй працы і сэрца.