Ніва № 17 (2450), 27 красавіка 2003 г.
Лічу сябе беларускайРазмова з Эвелінай ПЛІC з Шастакова, вучаніцай трэцяга класа Гімназіі ў Чыжах.— Ты закончыла вучобу ў мінулым годзе з шасцёркамі па ўсіх прадметах, заняла другое месца ў конкурсе па беларускай мове ў Падляшскім ваяводстве і пятае месца ў нашым ваяводстве ў матэматычным конкурсе „Кангур”. Ці апрача вучобы знаходзіш час на іншыя заняткі? — Вучоба займае многа часу. Аднак, я люблю чытаць. Чытаю кніжкі звязаныя з канкрэтнымі прадметамі і іншыя творы, якія мяне цікавяць. Люблю чытаць па-беларуску. Гуляю з камп’ютэрам і памагаю бацькам у гаспадарцы, бо не хачу жыць толькі на іх кошт. — Адкуль зацікаўленне беларускімі кніжкамі? — Я лічу сябе беларускай. Люблю чытаць па-беларуску, бо гэта ж мая родная мова. — Зараз штораз больш моладзі з беларускіх сем’яў лічыць сябе палякамі. Што мела ўплыў на фарміраванне тваёй нацыянальнай свядомасці? — Мая сям’я, у якой мы гаворым на беларускім дыялекце, родная вёска Шастакова, дзе таксама часта гавару з сябрамі па-свойму, школа з прадметам беларускай мовы і конкурсы арганізаваныя па гэтым прадмеце. — Якія конкурсы маеш на ўвазе? — У падставовай школе прымала я ўдзел у дэкламатарскіх конкурсах беларускай мовы, пасля ўдзельнічала ў конкурсе беларускай гавэнды арганізаваным у Гайнаўскім беларускім ліцэі і нават два разы займала ў ім трэцяе месца. Апошнім часам удзельнічала я ў конкурсе беларускай мовы. Рыхтуючыся да конкурсаў, знаёмілася я з беларускай літаратурай і беларускімі пісьменнікамі, пра якіх раней не чула. — Ты назвала прадмет беларускай мовы. — На ўроках беларускай мовы многа не патрабуюць і мы ахвотна на іх ходзім. Можна там пазнаёміцца з беларускімі справамі. — Ці твае школьныя сябры таксама лічаць сябе беларусамі? — Большасць моладзі, якая вучыцца ў нашай школе, гэта беларусы. Аднак, не ўсе перакананыя ў гэтым. Некаторыя вучні лічаць сябе палякамі толькі таму, што жывуць у Польшчы. Некаторыя бацькі размаўляюць між сабою па-свойму, а да дзяцей гавораць па-польску. Гэтыя дзеці нават і не ўмеюць гаварыць на беларускай гаворцы, што з’яўляецца штучнай з’явай. — Артыкулы, у якіх ты апісвала сваю школу і яе наваколле друкаваліся ў „Ніве”. Ці нехта заахвоціў цябе напісаць у наш тыднёвік? — Ужо добра не памятаю, але мне здаецца, што настаўніца беларускай мовы. Пасля ўжо самой хацелася пісаць. — Апошнім часам твая карэспандэнцыя ў „Ніву” спынілася. — На працягу мінулага года мы пачалі выдаваць у школе сваю газетку, у якой я з’яўляюся галоўным рэдактарам. — Якія тэмы закранаеце ў часопісе? — У галоўным пішам пра сваю школу і мерапрыемствы, якія ў ёй адбываюцца. Спачатку было многа ахвотных вучняў да пісання артыкулаў, але пасля стала цяжэй. Трэба некаторым напамінаць, каб пісалі тэксты. — Ці змяшчаеце тэкст на беларускай мове? — Я запрапанавала, каб зрабіць беларускамоўную частку газеты і пачалі мы рэалізаваць гэтую задуму. — У гэтым школьным годзе ты прыступіла да прадметных конкурсаў па беларускай, рускай і польскай мовах, па гісторыі і матэматыцы. Якія рэзультаты? — За выключэннем конкурсу па гісторыі, ва ўсіх іншых я перайшла да раённых элімінацый. — Ці хопіць часу, каб падрыхтавацца да ўсіх конкурсаў? — Калі я прыступала да іх то думала, што перамагу толькі ў некаторых і тады буду лепш да іх рыхтавацца. Атрымалася інакш і трэба будзе вучыцца да ўсіх. Думаю, што неяк спраўлюся. — Два гады ты была старшынёю Школьнага самаўрада, а зараз з’яўляешся яго сакратаром. Чым вы займаецеся? — Некаторыя школьныя мерапрыемствы арганізуем самі, а ў іншых памагаем. Арганізавалі мы конкурс на найлепшага настаўніка, у якім перамаглі Анна Ляўчук, Галіна Скепка і Ян Навіцкі. Ладзілі конкурс на самы цікавы прадмет, якім вучні назвалі заняткі па інфарматыцы. У час школьных мерапрыемстваў вучні выступаюць з артыстычнай часткай на беларускай мове. Мы разам з сяброўкамі выступаем у школьным калектыве „Гама”. — У гэтым годзе трэба будзе табе вырашаць, у якую сярэднюю школу падацца. — Хачу паступаць у Гайнаўскі беларускі ліцэй, бо мне здаецца, што гэта будзе самая лепшая для мяне школа. — Можа ёсць ужо планы на далейшую будучыню? — Я хацела б стаць журналістам або суддзёй і рабіць тое, што мяне цікавіць. Здаецца мне, што гэтыя прафесіі зацікавілі б мяне. — Дзякую за размову. Гутарыў Аляксей МАРОЗ
|