Хор Цітовіча ў Гайнаўцы

Аляксей МАРОЗ

Бурмістр Анатоль Ахрыцюк узнагародзіў хор ГДК, які на Фестывалі заняў першае месца. Павіншаваў ён гайнаўскія жанчыны са святам і прывітаў беларускіх гасцей. На гайнаўскі канцэрт прыбылі Станіслаў Буко — старшыня Камітэта па справах рэлігій і нацыянальнасцей пры Савеце Міністраў Рэспублікі Беларусь, Тацьяна Кавальёва з Міністэрства адукацыі Рэспублікі Беларусь і пасол РБ Павел Латушка з жонкай Наталляй. Удзельнікі хору ГДК выступілі ў адноўленым складзе і новых уборах. Затым белліцэісткі са „Знічкі” падзякавалі паслу Паўлу Латушку за камп’ютэр, які атрымалі ва ўзнагароду за першае месца на Фестывалі „Беларуская песня”, уручылі букет кветак і праспявалі падрыхтаваныя апошнім часам песні. Пасля выступілі салісткі Маргарыта Карпюк і Эмілія Горбач ды фальклорны калектыў з Комплексу школ з дадатковым навучаннем беларускай мовы ў Гайнаўцы.

Нацыянальны акадэмічны народны хор Рэспублікі Беларусь імя Г. І. Цітовіча заваражыў публіку спевамі, танцамі і аркестрам. Гайнаўскай публіцы вядомы ён з ранейшых канцэртаў. Першы раз хор Цітовіча выступіў у ГДК звыш дваццаці гадоў таму. Даваў канцэрт некалькі гадоў таму, а ў 1999 годзе атрымаў дыплом І ступені на Міжнародным фестывалі царкоўнай музыкі. У мінулым годзе хор адзначыў 50-годдзе свайго існавання. Дзяржаўны народны хор створаны быў з невялікага хору з вёскі Вялікае Падлессе, што на Брэстчыне. Яго кіраўнік Генадзь Цітовіч, харавы дырыжор, фалькларыст, этнограф ездзіў па вёсках Беларусі і самастойна запісваў песні для харавога рэпертуару. У 1975 годзе хор узначаліў дырыжор і знаўца фальклору прафесар Міхаіл Дрынеўскі, які кіруе ім па сённяшні дзень. Рэпертуар складае беларускі аўтэнтычны фальклор, апрацоўкі беларускіх народных песень, творы беларускіх кампазітараў і царкоўная музыка.

— Наш хор спяваў царкоўныя песні яшчэ пры Савецкім Саюзе. Добра ведаем Гайнаўку, давалі канцэрты і ў іншых гарадах Польшчы. Калі ехалі ў замежную краіну, бралі спецыяліста і вывучалі песню на мове гэтай краіны. Карэйцы хвалілі нас, што добра ведаем іх мову. Можам заспяваць і на польскай мове, — заяўляе прафесар Міхаіл Дрынеўскі. — У Польшчу прыехалі толькі 48 членаў хору, а ўсіх нас — 145.

Народны хор Рэспублікі Беларусь выступаў у многіх еўрапейскіх краінах, Кітаі, Канадзе і Карэі. У 1983 годзе хору прысвоена званне „Акадэмічны”, а ў 2002 атрымаў статус „Нацыянальны”. На гайнаўскай публіцы вялікае ўражанне зрабілі моцныя галасы мінскіх салістаў.