Вучні і Еўрапейскі Саюз

Аляксей МАРОЗ

У Комплексе школ з дадатковым навучаннем беларускай мовы ў Бельску-Падляшскім 58,1% гімназістаў галасавалі за ўступленне Польшчы ў Еўрасаюз, 22,2% вучняў былі супраць, а апошнія не мелі погляду на гэтую тэму. У Бельскім белліцэі 60% вучняў былі за інтэграцыю, а 31,3% супраць.

— Я прагаласавала за Еўрасаюз, бо ў нас вялікае беспрацоўе, а ў еўрапейскіх краінах можна будзе лягчэй знайсці працу, — заяўляе Марта Добаш з Бельскай белгімназіі. — Праўду кажучы, я не аналізавала за і супраць, але галасавала крыху эмацыйна.

— Я многа не ведаю аб Еўрасаюзе, але галасавала за ўступленне ў яго. Можа пасля інтэграцыі з еўрапейскімі дзяржавамі будзе лепш жыць у нашай краіне. Трэба паспрабаваць новага, — кажа Наталля Кучынская з Бельскай белгімназіі.

— Падкрэсліў я ў час рэферэндуму, што не выпрацаваў сваіх поглядаў у справе ўступлення ў Еўрасаюз. Аб будучай інтэграцыі з еўрапейскімі краінамі гаварылі мы на ўроках геаграфіі, многа чулі па тэлебачанні. Аднак гэтага замала, каб рашыцца, — гаворыць Адрыян Федарук з Гімназіі з дадатковым навучаннем беларускай мовы ў Бельску-Падляшскім.

У Гайнаўскім комплексе школ з дадатковым навучаннем беларускай мовы было менш чым у Бельску-Падляшскім прыхільнікаў Еўрасаюза. У белгімназіі за інтэграцыю прагаласавалі 57,9% вучняў, а супраць — 35,9%. У белліцэі за далучэнне да еўрапейскіх краін галасавалі 50%, а супраць — 44,5% вучняў.

— У час рэферэндуму мы абазначылі, што не выпрацавалі сваіх поглядаў на тэму ўступлення ў Еўрасаюз. Аб прадбачванай інтэграцыі з еўрапейскімі краінамі гаварылі мы на ўроках геаграфіі, гісторыі, слухалі аб гэтым па радыё і тэлебачанні. Аднак гэтых інфармацый было мала, каб рашацца. Мы апасаемся, што чужаземцы могуць пачаць купляць нашую зямлю, а людзі, якія будуць прыязджаць з-за мяжы, будуць ствараць канкурэнцыю на рынку працы, — заяўляюць Агнешка Занкевіч і Наталля Шляхцюк.

— Галасавала я супраць уступлення ў Еўрасаюз, бо апасаюся за нашую гаспадарку, якая не з’яўляецца стабільнай. Мы ахвотна купляем замежную касметыку, вопратку і польскі рынак не будзе мог абараніцца ад прадуктаў з Захаду. У такім выпадку можа павялічыцца беспрацоўе, — кажа вучаніца ІV „б” класа Гайнаўскага белліцэя.

У школах распаложаных па-за Гайнаўкай і Бельскам-Падляшскім яшчэ менш было прыхільнікаў інтэграцыі Польшчы з іншымі краінамі. У Арлянскай гімназіі за ўступленне ў Еўрасаюз галасавалі 51,4% вучняў, а супраць былі 37,5% гімназістаў. У Комплексе лясных школ у Белавежы толькі 36,8% вучняў галасавалі за інтэграцыю з Еўрасаюзам, а 55% вучняў былі супраць. У Чыжоўскай гімназіі 40,6% вучняў былі за Еўрасаюзам, а 43,5% супраць. Сярод школ, дзе вядзецца навучанне беларускай мове найбольш вучняў галасавалі супраць уступлення ў Еўрасаюз у Ягуштоўскай гімназіі (68,4% ) і толькі 25,4% гімназістаў падтрымалі там ідэю ўступлення ў Еўрасаюз. Выключэннем стала Дубінская гімназія, дзе 73,4% вучняў галасавалі за ўступленне ў Еўрасаюз і толькі 11,2% супраць.

— Я была супраць уступлення ў Еўрасаюз. Не думаю, каб на вёсцы стала лепш пасля яднання з еўрапейскімі краінамі. У Ягуштове большасць гаспадароў супраць уступлення ў Еўрасаюз. Кажуць, што для маладых будзе праца ў еўрапейскіх краінах, але цяжка будзе пакінуць сямейнікаў і ехаць за хлебам у іншыя дзяржавы. Кожны хоча жыць на бацькаўшчыне, — заяўляе Юстына Вышкоўская з Ягуштоўскай гімназіі.