Сустрэча з Аляксандрам Баршчэўскім

Дзмітры ШАТЫЛОВІЧ

Функцыю мадэратара прыняў Янка Жамойцін, які пазнаёміў прысутных з жыццёвым шляхам паэта і характарам яго творчасці. Паэт свае дзіцячыя гады правёў у вёсцы Бандары Беластоцкага павета. Бацька яго, селянін, пастанавіў вучыць сына і паэт у 1955 г. закончыў аддзяленне рускай філалогіі Лодзінскага універсітэта. Там ён добра пазнаёміўся з беларускай мовай і літаратурай і ў 1956 г. пераехаў у сталіцу працаваць на кафедры беларускай філалогіі Варшаўскага універсітэта.

У Варшаве пачаткова было яму вельмі цяжка, не меў кватэры і трэба было даязджаць на працу з Лодзі, а часта начаваць на лаўках ці сталах ва універсітэцкіх залах. У 1975 г. атрымаў пасаду загадчыка Кафедры беларускай філалогіі, а ў кастрычніку 2002 г. прэзідэнт Польшы Аляксандр Кваснеўскі прысвоіў яму званне звычайнага прафесара. А. Баршчэўскі з’яўляецца таксама ганаровым доктарам Беларускага дзяржаўнага універсітэта. Многа гадоў узначальваў ГП БГКТ у Беластоку, а цяпер з’яўляецца яго ганаровым старшынёй.

Літаратурная дзейнасць Алеся Барскага (бо такі літаратурны псеўданім абраў сабе паэт) пачалася ад дэбюту на старонках ,,Нівы” ў 1959 г. Выдаў зборнікі вершаў Белавежскія матывы, Жнівень слоў, Мой бераг, Блізкасць далёкага, Лірычны пульс. Выйшлі таксама публіцыстычныя зборнікі ў Варшаве і Мінску. Пісаў многа артыкулаў у ,,Ніву”. З’яўляецца членам Саюза польскіх пісьменнікаў і Саюза пісьменнікаў Беларусі. Ён даў назву,,Белавежа” беларускаму літаратурнаму аб’яднанню.

Янка Жамойцін прачытаў некалькі вершаў са зборнікаў і новых неапублікаваных твораў, у якіх паэт піша аб Белавежскай пушчы, сваёй маці і вёсцы.

Польшчу 1945-1998 гадоў паэт успамінае вельмі добра. Народная ўлада дала яму магчымасць вучыцца і зрабіць жыццёвую кар’еру. Ён быў членам партыі і гэтага не шкадуе, хаця не ўсё яму ў той час падабалася.

Паэт лічыць сябе атэістам. Бацька яго таксама не верыў у Бога, а маці была вельмі веруючай, але між імі на тэму веры ў Бога ніколі не было спрэчкі. Жылі вельмі добра, так сама як ён цяпер з жонкаю. Паэт некалькі гадоў таму хварэў на сэрца, прайшоў аперацыю, пасля якой адчувае сябе слабей. Цяпер у Бандарах застаўся па бацьках дом. Вельмі непрыемна прыязджаць у пусты дом у сваю родную вёску.

А. Баршчэўскі цяпер піша вершы несістэматычна. Бываюць перыяды, што нічога не піша, а часам на працягу аднаго дня можа напісаць і дваццаць твораў.

Сустрэча паэта з паклоннікамі яго творчасці закончылася пачастункам. Было віно, гарбата, пірожнае. Паэт падпісваў сваю кнігу Творцы беларускага літаратурнага руху ў Польшчы 1958-1998. На сустрэчы прысутнічала жонка паэта Ніна.