Самае важнае — папулярызацыя беларускай мовы

Аляксей МАРОЗ

Мерапрыемства адкрыў настаўнік беларускай мовы Ян Карчэўскі — ініцыятар і арганізатар конкурсу. Памагалі яму дырэктар белліцэя Яўген Сачко, яго намеснік Аляксандр Лаўрыновіч і старшыня Клуба беларускіх спраў „Граблі” Яўген Янчук. На конкурс прыбыў кіраўнік Аддзялення грамадскіх спраў Гайнаўскага староства Уладзімір Петручук, які ўручыў узнагароды найлепшым выканаўцам.

Вучні расказвалі на аснове літаратурных твораў, казак, легендаў, карысталіся сваімі тэкстамі. Гімназісты перавагу аддавалі аўтарскім расказам. Вялікае ўражанне на слухачах зрабіла Барбара Трафімюк з Гімназіі ў Дубічах-Царкоўных, якая на гаворцы расказала пра адно здарэнне ў вёсцы Грабавец. Умела і займальна расказвала таксама гімназістка Анета Трафімюк з Чыжоў. У гэтым годзе большасць вучняў карысталася дыялектамі і таму было менш моўных памылак.

— Расказчыкі захапілі мяне цікавай інтэрпрэтацыяй і трапнай падборкай рэпертуару. Цешыць, што так многа вучняў рыхтуецца да конкурсу, — заявіла старшыня камісіі Ірэна Ігнатовіч. — З самых цікавых тэкстаў можна будзе скласці зборнік.

— Не ўсе пачутыя расказы можна назваць гавэндай. Я вельмі задаволены моўным варштатам вучняў падставовых школ. У многіх выпадках яны лепш валодалі літаратурнай мовай, чым гімназісты, — сказаў член камісіі Міхась Андрасюк. — Самае важнае — папулярызацыя беларускай мовы сярод школьнікаў.

— У наступным годзе хочам выйсці з прапановай да вучняў іншых сярэдніх школ Гайнаўскага павета, у якіх не вывучаецца беларуская мова, — заявіў Ян Карчэўскі. — Яны ж ведаюць гаворку.

Перад удзельнікамі конкурсу выступілі белліцэісты з Бельска, якія спявалі аўтарскія песні пад акампанемент гітар. Камісія (Міхал Андрасюк, Ірэна Ігнатовіч і Васіль Сакоўскі) у групе вучняў падставовых школ першае месца прысвоіла Марце Матысюк з Семяноўкі. Другія месцы занялі Анна Грыгарук з ПШ н-р 6 у Гайнаўцы і Іаанна Герасімюк з ПШ н-р 3 у Гайнаўцы. Трэція месцы прыдзялілі Каралю Грыгаруку з ПШ у Кленіках, Эміліі Місяюк з ПШ у Чыжах і Магдаліне Каліноўскай з ПШ у Нараўцы. З ліку гімназістаў першыя месцы занялі Барбара Трафімюк з Дубіч-Царкоўных і Ева Мароз з Гайнаўскай белгімназіі. Другія месцы атрымалі Анета Трафімюк з Чыжоў, Барбара Каліноўская з Гайнаўскай гімназіі н-р 2 і Моніка Банькоўская з Нарвы. Трэція месцы прыдзялілі Агаце Капейчык з Нарвы, Паўліне Яканюк з Чыжоў і Паўліне Ігнацюк з Гайнаўскай белгімназіі. Усе ўдзельнікі конкурсу атрымалі дыпломы, а пераможцы — вартасныя кніжныя ўзнагароды. Усе настаўнікі, якія рыхтавалі вучняў, атрымалі віншавальныя лісты. Спонсарамі мерапрыемства былі Гайнаўскае староства, Рада горада Гайнаўкі, Беларускі саюз у РП і Бацькоўскі камітэт белліцэя.