Бюджэт, запаведнік і чыгунка

Аляксей МАРОЗ

Управа павета запрапанавала бюджэт з дэфіцытам размерам 2 364 тыс. зл. Плануе яна ўзяць крэдыт велічынёй 2 054 тыс. зл. і большасць яго выдаткаваць на патрэбы Комплексу аховы здароўя ў Гайнаўцы. Самыя вялікія сродкі (з субвенцыі) прызначаны на асвету і выхаванне (8,8 млн. зл.), сацыяльную апеку (3,8 млн. зл.), транспарт — публічныя павятовыя дарогі (3 млн. зл.) і адміністрацыю (2,8 млн. зл.), а самыя малыя на турызм (10 тыс. зл.). У параўнанні з праектам бюджэту, прадстаўленым восенню мінулага года, новы варыянт прадбачваў меншыя выдаткі на школьніцтва. Старшыня Беларускага самаўрадавага форуму і радны БНВК Міхась Андрасюк крытычна ацаніў абмежаванне субвенцыі Гайнаўскаму белліцэю (на 123 тыс. зл.) і Комплексу лясных школ у Белавежы (на 111 тыс. зл.).

— Комплекс школ з дадатковым навучаннем беларускай мовы ў Гайнаўцы, як школа нацыянальнай меншасці, павінна атрымаць пабольшаную на 20% субвенцыю, — гаварыў Міхась Андрасюк. Звярнуў ён увагу, што асабовы састаў Управы Гайнаўскага павета амаль у 50% сыходзіцца з Гайнаўскай павятовай управай БГКТ, для якой важны павінны быць справы беларускай меншасці. Стараста Уладзімір Пятрочук не патлумачыў як выдаткоўваецца 20-працэнтны дадатак для меншасных школ, толькі паінфармаваў, што абмежаванне выдаткаў для Комплексу школ з дадатковым навучаннем беларускай мовы не будзе вялікае. Сродкі ад памяншэння бюджэтаў школ будуць пераведзены ў рэзерв і пасля могуць трапіць у школы. У час галасавання 13 радных падтрымалі праект бюджэту, а 4 стрымаліся ад галасавання (у гэтым ліку 2 радных БНВК).

З ліку датацый на культурную дзейнасць 30 тыс. зл. атрымае Таварыства „Любіцеляў царкоўнай музыкі” — арганізатар Дзён царкоўнай музыкі (прасілі 50 тыс. зл.). Беларускі музей у Гайнаўцы атрымае 5 тыс. зл. (выступалі за 40 тыс. зл.). Галоўнаму праўленню БГКТ у Беластоку перададзеных будзе 8 тыс. зл., а Фонду камернай і арганнай музыкі ў Гайнаўцы і Саюзу любіцеляў народнай культуры ў Чаромсе — па 5 тыс. зл. На падтрымку спартыўных арганізацый выдзелена 9 600 злотых.

Намеснік старасты Ежы Сірак паінфармаваў радных аб рашэнні Дырэкцыі дзяржаўнай чыгункі аб скарачэнні пасажырскіх перавозаў на Гайнаўшчыне. На трасе Беласток — Чаромха ад 10 сакавіка мелі ездзіць толькі дзве пары цягнікоў. З Чаромхі ў Бельск-Падляшскі дадаткова мелі вазіць пасажыроў на аўтобусным транспарце. Прадугледжвалася абмежаванне да двух пар цягнікоў з Чаромхі ў Седльцы і ліквідацыя поезда з Гайнаўкі ў Варшаву. Надалей з Гайнаўкі ў Цісоўку будзе ездзіць рэйкавы аўтобус, якім у большасці даязджаюць чыгуначнікі і іх сем’і. У пачатку сакавіка чыгуначныя ўлады адтэрмінавалі выкананне пастановы аб ліквідацыі нерэнтабельнага чыгуначнага транспарту да красавіка.