Цешыла вялікая разнавіднасць рэпертуару

Янка ЦЕЛУШЭЦКІ

Сабраных слухачоў прывітаў і зычыў цудоўных уражанняў ад канцэрта старшыня Галоўнага праўлення Беларускага грамадска-культурнага таварыства Ян Сычэўскі. Заявіў ён, што Фестываль „Беларуская песня 2003” адбываецца пад ганаровым патранатам міністра замежных спраў РП Владзімежа Цімашэвіча ды Польскага радыё і Польскага тэлебачання ў Беластоку.

Вялі агляд Іаанна Голец і Аркадзь Якімюк, якія пяць гадзін запрашалі на сцэну штораз новых выканаўцаў беларускіх песень.

Камісія, якую састаўлялі народны артыст Рэспублікі Беларусь праф. Міхась Дрынеўскі (старшыня), Тадэвуш Стружэцкі, Анджэй Данільчук, Марк Лаўрашук і Андрэй Такаюк (члены), мела многа працы, бо трэба было ацэньваць калектывы і салістаў у дзесяці катэгорыях.

— Вельмі добра сталася, што на сцэне чуем аўтэнтычны беларускі фальклор. Нават моладзь спявае даўнія беларускія песні, якія спявалі іх бабулі ці матулі, — сказала Валянціна Ласкевіч, сакратар Галоўнага праўлення БГКТ. — Для яе гэта вяртанне да крыніц, да нацыянальнай традыцыі. Гэта і шлях да шырэйшага развіцця нацыянальнай свядомасці.

Канцэрт падабаўся публіцы. Выканаўчы ўзровень быў высокі. Паўплывала гэта і на рост замілавання да роднай песні. Песня разагравала душу і ўсім было хораша. Песні, у якіх шмат духоўнасці, узвышалі душу чалавека, рабілі яго дабрэйшым. Перш-наперш сярод спявачак былі такія, якія асабліва зачароўвалі сваёй экспрэсіяй і энергіяй. Умелі яны завесці публіку і падарыць кожнаму тое, што яму трэба: хвіліну лірыкі, роздуму, пяшчоты.

Хто яны? Пра іх будзе вердыкт журы.

Сярод салістаў, якія прэзентавалі аўтэнтычны фальклор, першае месца выспевала Ніна Цыванюк з Гарадка, другія — раўнапраўныя — Вольга Ахрымюк з Чыжоў і Кацярына Ціханюк са Збуча ды трэцяе месца — Валянціна Марціновіч з Краснага Сяла. Былі таксама два вылучэнні для Веры Нічыпарук і Анны Кулік з Маліннікаў. Сярод дуэтаў, тэрцэтаў і квартэтаў першае месца прызналі тэрцэту з „Каліны” з Дашоў, другія раўнапраўныя дуэтам: Валянціна Марціновіч і Галіна Грабарук з Краснага Сяла ды Валянціна Франкоўская і Вольга Свентахоўская з Тыневічаў-Вялікіх, а трэцяе месца — дуэту Надзея Дацэвіч і Зінаіда Баена з Мельніка. Вылучэнне выпала на долю дуэта Зофія Кердалевіч і Еўдакія Маркевіч з Дашоў. У групе вакальных калектываў першае месца заваявалі „Арэшкі” з Арэшкава, другія раўнапраўныя — „Красуні” з Краснага Сяла і фальклорная група хору „Васілёчкі” з Бельска-Падляшскага ды трэцяе — фальклорны калектыў з Дабрывады.

У катэгорыі апрацаванага фальклору першае месца сярод салістаў выспевала Марыя Врублеўская з Гарадка, другія раўнапраўныя — Марыя Хіліманюк з Нарвы і Мікалай Іванчук з Бельска-Падляшскага, трэцяе — Ірэна Лапінская са Старога Ляўкова. Сярод дуэтаў, тэрцэтаў і квартэтаў першае месца заняў квартэт „Госці з нізін”, а другое месца падзялілі дуэты: Ірэна Паўлючук і Ніна Харужая з Гарадка ды Ніна Шыманская і Яўгенія Хмялеўская з Орлі. Вылучэнне атрымаў тэрцэт „Тыневічанак” з Тыневіч-Вялікіх. Сярод калектываў першае месца падзялілі фальклорны калектыў з белліцэя ў Гайнаўцы і „Расспяваны Гарадок” з Гарадка. Тры раўнапраўныя другія месцы занялі: „Цаглінкі” са Старога Ляўкова, жаночая група хору „Крыніца” з Беластока і „Рэчанька” з Козлікаў. Гэтаксама было і з трэцім месцам. Занялі яго мужчынская група „Крыніцы” з Беластока, мужчынская група хору Гайнаўскага дома культуры і „Загадка” з Супраслі. Сярод вакальна-інструментальных калектываў прызналі па два раўнапраўныя першыя месцы: „Дзявочым ноткам” і „Маланцы” з Бельска-Падляшскага, другія: вакальна-інструментальнаму БГКТ з Беластока і калектыву „Тырса” з Кляшчэляў ды трэція: „Асенняму лісту” з Гарадка і капэле з Дубін. Сярод эстрадных калектываў першага месца журы не прызнала, а другое заняў калектыў „Сацыялогія” з Беластока. У групе хораў пераможцамі сталі: „Крыніца” з Беластока (першае месца), „Васілёчкі” з Бельска-Падляшскага (другое месца) і хор з Залук (трэцяе месца).

У катэгорыі сучаснай песні сярод салістаў перамагла Малгажата Карпюк з Гайнаўкі. Другое месца заняла Святлана Кобус з Бельска-Падляшскага. Трэція раўнапраўныя выспевалі Уладзімір Камарчук з Орлі і Кацярына Пэлікша з Нарвы. Сярод дуэтаў і квартэтаў найлепш адрэкамендавалі сябе: дуэт Марта Драль і Магдаліна Окулюс з Беластока (першае месца), дуэт Беата Кардаш і Магдаліна Лютастанская з Гарадка (другое месца) і квартэт „Цаглінак” са Старога Ляўкова (трэцяе месца). У групе вакальных калектываў найлепшай была „Знічка” з Гайнаўскага белліцэя. Другое месца падзялілі: жаночая група бельскіх „Васілёчкаў” і дзявочая група беластоцкіх „Каласкоў”. Трэцяе месца журы прызнала жаночай групе хору Гайнаўскага дома культуры. Сярод вакальна-інструментальных калектываў найлепшы быў гурт „Прымакі”. Сярод эстрадных калектываў першынство заваяваў гурт „The Best” з Сямятыч, другое месца заняў „Лідэр” з Беластока і трэцяе — „Сакрэт” з Міхалова. Сярод хораў два раўнапраўныя першыя месцы занялі „Каласкі” з Беластока і хор Гайнаўскага дома культуры, другое — мужчынскі хор з Бельска-Падляшскага.