Дайма права выбару

Аляксей МАРОЗ

12 лютага на сустрэчу ў магістрат прыйшло мала асоб. Апрача гарадскіх чыноўнікаў прыбылі толькі старшыня Гарадской рады Якуб Астапчук (на ўдзел гайнаўскіх радных не згадзіліся купцы) і журналісты. Хаця не прыбылі прадстаўнікі Саюза купцоў і прадпрымальнікаў, то адбыліся адкрытыя размовы з Янам Пшаздзецкім і Бартошам Казімерчукам. Яны з удзелам сваіх сямейнікаў і аднаго з варшаўскіх банкаў заснавалі суполку для будовы ў Гайнаўцы магазіна. Бурмістр Анатоль Ахрыцюк і падначаленыя яму чыноўнікі прадставілі ход падзей, якія спрычыніліся да адмены вынікаў аўкцыёну аб продажы ўчастка.

— 31 студзеня не адбылася сустрэча з купцамі, а мітынг. Яны „вымусілі” на мне ануляваць вынікі аўкцыёну аб продажы ўчастка і ў рабочы дзень перадаў я сваю пастанову інвестару, — заявіў Анатоль Ахрыцюк.

Прадпрымальнікі з Варшавы звярнулі ўвагу, што пастанова аб адмене вынікаў аўкцыёну прыйшла да іх толькі дзень да запланаванага падпісання акту продажу зямлі. Тады былі ўжо сабраны сродкі на куплю ўчастка. Рашэнне спрычыніцца да фінансавых трат варшаўскай суполкі. Ян Пшаздзецкі і Бартош Казімерчук прапанавалі кампраміс, хаця не адкідалі вырашэння справы шляхам судовага працэсу з горадам.

— Толькі ПСС „Сполэм” фінансава пацерпіць на нашай інвестыцыі ў Гайнаўцы. Апрача вялікай гандлёвай плошчы, дзе ў 90% будуць прадавацца харчовыя прадукты, падрыхтуем галерэю размерам 500 квадратных метраў, дзе будзе месца для 20 меншых магазінаў. Харчпрадукты ў першую чаргу будзем старацца купляць у мясцовых вытворцаў, — сказалі Ян Пшаздзецкі і Бартош Казімерчук. — Нашы прадукты не будуць канкурэнтнымі для малых магазінаў, якія прадаюць свежыя булачкі і прадукты патрэбныя штодзень. Спадзяемся, што да нас будуць прыязджаць людзі ў выхадныя дні і рабіць вялікія пакупкі. Прадбачваем, што нават з Бельска і Сямятыч будуць прыязджаць людзі за нашымі прадуктамі. Яны могуць наведаць гайнаўскія рэстараны і там таксама пакінуць свае грошы. Падаткі ад нашай дзейнасці застануцца ў Гайнаўцы.

Варшаўскія прадпрымальнікі не згадзіліся з абвінавачваннямі ў адрас бурмістра з боку кіраўніцтва ПСС „Сполэм” і Акруговага малочнага кааператыва ў Гайнаўцы. Заявілі яны, што не намерваюцца прадаваць зямлю замежным інвестарам і патлумачылі, што іх магазін нельга назваць супермаркетам (хаця ўся яго плошча будзе большай за 4 тысячы квадратных метраў, то яго гандлёвая частка будзе меншай за 2 тысячы метраў). Прадпрымальнікі хочуць закончыць будову магазіна ў гэтым годзе, але самі не прадбачваюць займацца гандлем. Самаабслуговую плошчу плануюць наняць суполцы, якая будзе займацца рознічным гандлем. Не прадбачваецца будова разам з магазінам бензастанцыі, пякарні і бойні, аб якіх пісалі працаўнікі ПСС „Сполэм”. Ян Пшаздзецкі і Бартош Казімерчук паінфармавалі, што ў сувязі з будовай магазіна перададуць гайнаўскім уладам 200 тысяч злотых на інвестыцыі ў горадзе. Гайнаўскія ўлады і прадпрымальнікі згадзіліся спісаць усе дэкларацыі, каб можна было іх выкарыстаць пры падпісванні дамовы аб продажы ўчастка.

Журналісты пачулі многа абяцанняў, але цяжка згадзіцца з вывадам, што будова вялікага магазіна не абмяжуе даходаў уласнікаў малых прылаўкаў. Калі жыхары Гайнаўкі будуць рабіць пакупкі ў адным магазіне, то не купляць гэтых самых прадуктаў у другім. Хаця паявіліся абяцанні, што ў новым магазіне ў першую чаргу будуць разглядацца прашэнні на працу купцоў, якія страцяць работу па прычыне абанкручання магазінаў, то ніхто не можа гарантаваць ім гэтай працы. Аднак бурмістр павінен аналізаваць карысці і траты для ўсіх жыхароў Гайнаўкі.

— Трэба перарваць маразм і ўзяцца за работу. Будова вялікіх магазінаў у такіх гарадах як наш, гэта толькі справа часу. Ёсць у горадзе прыватныя ўчасткі, якія могуць прадавацца заходнім інвестарам. Дайма людзям права выбару, каб манапалісты нікога не абмяжоўвалі, — гаварыў бурмістр Анатоль Ахрыцюк.

Бурмістр у час спаткання канчаткова не рашыўся прадаць зямлі пад будову магазіна. Заявіў, што хоча яшчэ спаткацца з прадстаўнікамі Саюза купцоў і прадпрымальнікаў. Абяцаў даць адказ варшаўскім інвестарам на працягу двух тыдняў.