З перавагай фальклору

Аляксей МАРОЗ

Першымі на мерапрыемстве, арганізаваным БГКТ і ГДК, выступілі жаночая і мужчынская вакальныя групы хору Гайнаўскага дома культуры, а пасля цэлы хор. Камісія, якую ўзначальваў Анджэй Данільчук, прыдзяліла жанчынам і цэламу хору першыя месцы. Другое месца занялі мужчыны. Сярод харыстаў з ГДК можна было заўважыць новых спевакоў. Апошнім часам удзельнікаў хору папоўнілі царкоўныя харысты. Анна Карэтка з Нараўкі заспявала пры акампанеменце моладзі з Дубін. Пазней выступіла капэла з Дубін, якой кіруе Пётр Скепка. Калектыў пры Гмінным асяродку культуры ў Дубінах існуе ўжо другі год. Маладыя члены капэлы вучацца ў музычных школах, іграюць на акардэоне і гітары ды рэдка сустраканых на беларускіх аглядах інструментах (кантрабасе, скрыпцы, трамбоне, кларнеце). Калектыў апрацоўвае і выконвае вясковыя песні Гайнаўшчыны і ранейшыя хіты іншых калектываў. Нядаўна пашылі нацыянальную вопратку з выкарыстаннем узораў з макатак. Кіраўнік Пётр Скепка бачыць сярод сваёй моладзі здольных выканаўцаў, якія ў гайнаўскіх элімінацыях занялі другое месца.

Валянціна Франкоўская і Вольга Свентахоўская з Тыневіч-Вялікіх, якія выступаюць на сцэне 25 гадоў, крыху хваляваліся перад элімінацыямі. Марыя Хіліманюк з Нарвы праспявала вясёлыя песні, якія спадабаліся публіцы (прыйшлося выступіць паўторна). Яна — кіраўнік калектыву „Рэха пушчы”, які дзейнічае пры Саюзе пенсіянераў і інвалідаў у Гайнаўцы і член калектыву ў Нарве.

„Чыжавяне” рады былі, што пасля гадавога перапынку ізноў падрыхтавалі новыя песні. Анатоль Куніцкі з Гродна ўмела падрыхтаваў калектыў да элімінацый (занялі першае месца). Без інструктара рыхтаваліся „Незабудкі” з Курашава, якія занялі трэцяе месца. Вясной курашаўскія жанчыны святкаваць будуць 25-годдзе свайго калектыву.

У катэгорыі сучаснай песні белліцэісты выступалі сола і калектыўна. Камісія салістам не прыдзяліла першага месца, затое другое атрымалі Малгажата Карпюк і Іаанна Врублеўская. „Знічка”, якая прыгожа заспявала песні „Гора” і „Нашы любімыя”, заняла першае месца і атрымала гарачыя апладысменты публікі. Вакальная група з Гайнаўскага белліцэя нестандартна заспявала фальклорныя песні і атрымала спецыяльную ўзнагароду.

У катэгорыі апрацаваных фальклорных песень першае месца заняла згаданая Марыя Хіліманюк, другое — Ірэна Лапінская са Старога Ляўкова, а трэцяе — Анна Карэтка, якая выступіла ў суправаджэнні капэлы з Дубін. Квартэт „Цаглінкі” заняў першае месца, а тэрцэт „Тыневічанкі” — другое. Сярод вакальных калектываў першае месца занялі „Цаглінкі” з Ляўкова, другое — „Тырса” з Кляшчэляў, згаданыя „Дубіны” і „Нараўчанкі”.

У групе выканаўцаў, якія спявалі неапрацаваныя фальклорныя песні першае месца занялі тэрцэт „Каліна” з Дашоў і калектыў „Арэшкі” з Арэшкава. Другія месцы занялі Вольга Ахрымюк з Чыжоў, Кацярына Ціханюк са Збуча, дуэты „Тыневічанкі”, „Каліна” з Дашоў і калектыў „Тыневічанкі”. Трэцяе месца прыдзялілі тэрцэту „Збучанкі”, квартэту з Дабрывады, калектывам „Гарчарочкі” з Кляшчэляў і „Крыўчанкі” з Крыўца.