Ніва № 8 (2441), 23 лютага 2003 г.

Цэрквы, каплічкі, крыжы

У Малой галерэі Гайнаўскага белліцэя знаходзіцца выстаўка фатаграфій настаўніка Комплексу школ у Дубічах-Царкоўных Славаміра Куліка „Цэрквы, каплічкі, крыжы”. На вялікіх здымках можна ўбачыць храмы са Старога Корніна, Пасынак, Чыжоў і гайнаўскі Свята-Троіцкі сабор. Побач іх вісяць прыгожа апраўленыя Віктарам Кабацам, які займаецца падрыхтоўкай выставак у белліцэі, фатаграфіі каплічак з Рыбалаў, Старога Корніна, Кленік, Гайнаўкі, Шчытоў і Тапіла. Славамір Кулік зрабіў многа фатаграфій драўляных прыдарожных і прыцаркоўных крыжоў. Цікавейшыя змясціў на выстаўцы так, каб крыжы разам з акружаючай прыродай састаўлялі цікавую кампазіцыю. Нестандартна сфатаграфаваны металічныя дэталі крыжоў з могілак у Істоку і Вярстоку і цікава паказаны стары крыж з могілак у Чыжыках. Зараз на могілках засталося толькі некалькі крыжоў і амаль не відаць магіл. Праз некалькі гадоў могуць зваліцца і гэтыя крыжы, якія, так як праваслаўная каплічка побач Гайнаўкі, з’яўляюцца часта фатаграфаваным аб’ектам. Многа крыжоў сфатаграфаваў аўтар каля Лядаў у Чыжоўскай гміне, дзе знаходзілася крыніца з цудадзейнай вадой.

— Па вёсках штораз часцей можна ўбачыць сцены старых дамоў прыкрытыя „сайдынгам”, што беззваротна мяняе вясковы клімат. Трэба заклікаць людзей, каб захоўвалі вясковую архітэктуру ў традыцыйным стылі. Хачу сфатаграфаваць цікавейшыя месцы ва ўсім Гайнаўскім павеце — асабліва сакральную і драўляную архітэктуру. Трэба, каб засталося на здымках тое, што хутка можа знішчыцца, — лічыць Славамір Кулік.

(ам-з)