Управа ідзе крок назад

Мацей ХАЛАДОЎСКІ

Ваяводскі кантракт гэта своеасаблівая дамова, якая датычыць супольнага фінансавання з урадам некаторых інвестыцый і праектаў. Сёлета Падляшша мае атрымаць з цэнтральнага бюджэту 16 мільёнаў злотых. Кантракт у актуальным кшталце заключылі папярэднія правыя ўлады са Славамірам Згжывам на чале (сёння віцэ-старшынёй Сейміка), пры адабрэнні Сейміка здамінаванага Выбарчай акцыяй „Салідарнасць” і саўдзеле правых паслоў, сярод якіх найактыўную ролю адыгрываў Кшыштаф Юргель (тады — Паразуменне Цэнтр, цяпер — Права і Справядлівасць). Сённяшняя левая ўправа хоча больш на 4 мільёны зл. прызначыць на інвестыцыі.

— Я хачу, каб сродкі, асабліва тыя, што паходзяць з Нацыянальнага фонду падтрымкі, цэнтральнага бюджэту, былі накіроўваны на развязку найбольш неабходных мэт, — запэўніваў на прэс-канферэнцыі маршалак Кшыжэўскі.

Сярод тых мэт: разбудова школ у Сямятычах, мадэрнізацыя павятовых дарог і будынкаў дамоў сацыяльнай апекі, а таксама рамонт франтона Беластоцкай філармоніі і Драматычнага тэатра ў Беластоку.

Януш Кшыжэўскі і член ваяводскай управы Караль Тыленда інфармавалі таксама аб адмяненні аўкцыёна на г.зв. „інфарматычную сістэму ўспамагання кіравання ваяводствам”. Справа ў вылучэнні папярэдняй управай фірмы, якая мела заняцца закладкай сеткі камп’ютэраў у Маршалкоўскай управе і падрыхтоўкай праекта „Інфармацыйнае грамадства” (нашага рэгіёна), а які быў бы падставай здабывання грошай з Еўрасаюза. Як сцвердзіў Караль Тыленда, аўкцыён (вартасці 5 млн. зл.) быў праведзены нязгодна з Законам аб публічных заказах, што пацвердзіў старшыня Установы публічных заказаў і загадаў нанава разгледзець прапановы. Тыленда тлумачыў, што ўдзельнікі аўкцыёна м.інш. завысілі ў прапановах удзел польскіх вырабаў. Апроч таго, папярэдняя ўправа пагадзілася ўтрымаць адно з сеціўных інфарматычных спалучэнняў даражэйшае ў чатыры разы чым у іншых прапанаваных. Дарыюш Цішэўскі, падляшскі віцэ-маршалак папярэдняй кадэнцыі, у той час адказны за пытанні звязаныя з аўкцыёнам, усе „ўнушэнні” аб няправільнасцях назваў „татальнай бязглуздзіцай”, прытым яшчэ на два дні да прэс-канферэнцыі членаў новай управы. У сваю чаргу Караль Тыленда запэўніваў: „Грошы будуць выдаткоўвацца больш разумна”.

Пры нагодзе прэс-канферэнцыі стала вядомым, што сумненні новай управы выклікае ўдзел Падляшша ў Канферэнцыі перыферыйных надморскіх рэгіёнаў, да якое наша ваяводства далучылася перад апошнімі самаўрадавымі выбарамі. Гадавая складчына ў гэтай арганізацыі — 25 тысяч злотых. А яшчэ і папярэдні маршалак Славамір Згжыва абавязаўся арганізаваць у Беластоку канферэнцыю балтыйскай камісіі таго аб’яднання, аплаціць закватараванне і харчаванне яе ўдзельнікаў. Калі выходзіць гэты нумар „Нівы”, сустрэча мела ўжо адбыцца.

— На спатканні спрабуем адказаць на пытанне, ці варта быць членам гэтае арганізацыі, — раней сцвердзіў маршалак Кшыжэўскі.

У Канферэнцыю ўключаны 150 еўрапейскіх рэгіёнаў. Яе супольны клопат — выкарыстанне рэсурсаў мора і лініі пабярэжжа. Падляшша летась за далучэнне да Канферэнцыі было ўзнагароджана „Выбарчай газетай” „Залатым унітазам” за найбольш абсурдную ідэю ўлады.