Ніва № 6 (2439), 9 лютага 2003 г.

Не парываць з традыцыяй

Віктар БУРА

Гайнаўскі аддзел БГКТ існуе ад 20 мая 1956 г., а першым яго старшынёю быў інжынер Мікалай Тарасевіч з Завода сухой перагонкі драўніны. У 1960 г. аддзел налічваў 16 гурткоў БГКТ, апекаваўся 26 калектывамі народнай самадзейнасці (пераважна харавымі калектывамі). Самымі актыўнымі былі самадзейнікі з Ласінкі, Кленік, Кузавы, Нарвы, Дабрывады, Навасад, Арэшкава і Кляшчэль. Паўставалі таксама драмгурткі, прыбывалі маладыя актывісты з ліку інтэлігенцыі, рабочых і сялян.

Аддзел працаваў паводле планаў, якія выходзілі насустрач запатрабаванню беларускай грамадскасці на культурныя мерапрыемствы. Трэба аддаць пашану тым дзеячам, якія шмат гадоў узначальвалі Гайнаўскі аддзел БГКТ, у тым ліку пакойнаму Аляксандру Іванюку, тадышняму настаўніку беларускай мовы і дырэктару беларускага ліцэя. Умеў ён сумясціць абавязкі дырэктара і настаўніка з грамадскай пасадай старшыні і з вялікай ангажаванасцю працаваць на карысць беларускай культуры.

Памятаюцца мне тадышнія навагоднія балі, запусты, сустрэчы з беларускімі пісьменнікамі — „белавежцамі” і гасцямі з БССР, журналістамі, экскурсіі па краіне і Беларусі. На беларускіх навагодніх балях зала Дома настаўніка (там змяшчаўся таксама аддзел БГКТ) заўсёды была запоўнена гасцямі, нават у гасцінных пакоях стаялі столікі. Заўсёды ўдзельнічаў у іх Аляксандр Іванюк са сваімі настаўнікамі, прыязджалі таксама настаўнікі з усёй Гайнаўшчыны. Прыходзіла моладзь і дарослыя з вуліцы Горнай, харысты. Сабраныя спявалі, танцавалі, весяліліся вакол стройнай ёлачкі. Апоўначы старшыня аддзела БГКТ выступаў з прывітаннем, затым гучэлі песні, віншаванні. У мінулым Гайнаўскі аддзел БГКТ быў адным з першых ва ўсім БГКТ.

А як распачаўся 2003 год у нашым асяроддзі? У гімназіі ў Чыжах арганізавалі Куццю (пісала аб гэтым „Ніва”). Душа радуецца, што ёсць яшчэ такія дырэктары, настаўнікі і моладзь, якім наша мінулае дарагое. Другі станоўчы прыклад даў войт Дубіцкай гміны Анатоль Паўлоўскі, які 13 студзеня арганізваў навагодняе мерапрыемства з удзелам калектыву „Дабравушка” калгаса Навасёлкі Камянецкага раёна. Такога міжнароднага праваслаўнага „Сільвестра” павінны пазайздросціць вопытныя гайнаўскія дзеячы.

Кіназала ў Беларускім музеі пад канец года была адмалявана і мне здавалася, што вядзецца падрыхтоўка да навагодняга балю па старым стылі. Аднак сталася інакш. 13 студзеня г.г. дзверы Беларускага музея ў Гайнаўцы былі зачынены. Для многіх прыхільнікаў беларускіх навагодніх баляў быў гэта свайго роду шок. Ці навагоднія беларускія балі застануцца толькі ва ўспамінах?

Традыцыя не павінна загінуць. Яна яднае беларусаў, натхняе іх на далейшыя гады, становіцца стымулам для сустрэч на чарговых мерапрыемствах. Шкада, вельмі шкада, што парываем з традыцыяй.