Жывая традыцыя калядавання

Аляксей МАРОЗ

— Традыцыя калядавання пераходзіць з пакалення на пакаленне і трэба, каб мы не забывалі пра яе. Захоўвайма сваю тоеснасць, мову і праваслаўную культуру. Перадавайма наступным пакаленням тое, што атрымалі, — заявіў мітрапаліт Сава, які выступіў са святочнымі пажаданнямі. — Чалавек толькі верай можа зразумець як Бог прыняў людское цела. Трэба сведчыць аб гэтым усяму свету.

Першым выступіў Дзіцячы хор Свята-Троіцкага прыхода ў Гайнаўцы, якім кіруе Міраслава Дземянюк, а затым калядкі спявалі дзеткі з самаўрадавых садкоў, якіх рыхтавала Вера Акачук. Наймалодшыя ўдзельнікі конкурсу зацікавілі публіку шчырасцю. Яны адважна і займальна спявалі калядкі, віталіся і развітваліся з гледачамі. Выступілі яны ў белых блузачках і кашулях і не забылі пра гвязду. Конкурсная камісія, якую складалі протаіерэй Іаан Раманчук, Аляксандр Лукашук, Іаанна Петручук, Анна Цыркун і Альжбета Кандрусік-Федарчук, два першыя месцы прысвоіла дзеткам з самаўрадавых прадшколляў н-р 1 і н-р 5, другое месца — другой групе каляднікаў з прадшколля н-р 5, а трэцяе — хлопчыкам і дзяўчаткам з прадшколля н-р 3. Сярод вучняў падставовых школ найпрыгажэй спявалі дзеткі з Арэшкава, якіх рыхтавала Бэата Маркевіч і Чаромхі, якімі кіруе а. Мікалай Беламызы і яны ўзялі першыя месцы. Другія месцы занялі вучні з падставовых школ н-р 1 і н-р 5 з Гайнаўкі, а трэція — вучні з Белавежы і школы н-р 2 з Гайнаўкі. Пасля выступлення ўсе ўдзельнікі мерапрыемства атрымалі святочныя падарункі.

— Зараз перыяд, калі трэба хваліць Нараджэнне Хрыстовае. Гэта духовая радасць, — сказаў епіскап Гайнаўскі Міран, выступаючы перад гайнаўскай публікай. — Літургія і сустрэчы з калядкамі яшчэ больш нас адухаўляюць.

Наталля Зофія Лемеш і Павел Валкавыцкі вялі мерапрыемства ды прэзентавалі хоры і іх рэпертуар. На канчатковую ацэнку галоўны ўплыў мела выкананне калядак на беларускай, рускай і ўкраінскай мовах. Дадатковыя балы атрымлівалі ўдзельнікі спатканняў за гвязду.

У групе гімназічных школ першае месца занялі вучні з Гімназіі з дадатковым навучаннем беларускай мовы і Гімназіі н-р 1 з Гайнаўкі. Белгімназісты, якімі кіруе Бажэна Ляўчук, састаўлялі самы вялікі калектыў (36 асоб). У групе вучняў з Гімназіі н-р 1, якіх рыхтавала Марыя Леўша, спявала больш за 10 асоб. Выступленні абодвух калектываў спадабаліся гледачам. Другое месца занялі гімназісты з Чыжоў, якія звычайна спяваюць у вакальным калектыве „Гама”, а трэцяе з Дубіноў і Гімназіі н-р 2 у Гайнаўцы. У катэгорыі вучняў сярэдніх школ найбольш спадабалася выступленне гайнаўскіх белліцэістаў з калектыву „Знічка”, якіх рыхтавала Бажэна Ляўчук. Апошнім часам калектыў быў папоўнены першакласнікамі, якія раней спявалі ў калектыве белгімназіі. На сцэне ГДК прыгожа спявалі больш за 20 белліцэістаў, у тым ліку і хлопцы. Занялі яны першае месца, другое — вучні з Комплексу прафесійных школ і Комплексу агульнаадукацыйных школ з Гайнаўкі. Вучні прафесійных школ спявалі з духавым аркестрам, што зрабіла іх спеў больш цікавым.

Арганізатары конкурсу выдзелілі асобную катэгорыю, у якой выступілі дзіцячыя і маладзёжныя прыхадскія хоры. Першыя месцы сярод іх занялі хоры „Рамонка” з Ласінкі (раней „Лісічкі”), які рыхтавала Марыя Радчук і Дзіцячы хор прыхода Нараджэння св. Іаана Хрысціцеля з Гайнаўкі, якім кіруе Вірынея Кацюбайла. Другое месца занялі дзіцячыя хоры Свята-Троіцкага прыхода з Гайнаўкі і прыхода Успення Прасвятой Багародзіцы з Кляшчэляў. Трэцяе месца заняў маладзёжны хор Дзмітрыеўскага прыхода з Гайнаўкі. Спецыяльную ўзнагароду атрымалі дзеткі з Самаўрадавага прадшколля н-р 5, як самыя маладыя ўдзельнікі агляду. Лаўрэаты конкурсу атрымалі дыпломы, а калектывы, якія занялі першыя месцы — грашовыя ўзнагароды (уручыла іх Нэля Шчука, член управы Саюза „Любіцелі царкоўнай музыкі”).