Гайнаўскія сэрцы святочнай дапамогі

Міхал МІНЦЭВІЧ

Сёлета валанцёры збіралі грошы на закупку спецыялістычнага медыцынскага абсталявання для шпітальных аддзяленняў, у якіх лечаць немаўлят і дзетак. У „Белай ружы” адбыўся аўкцыён і латарэя, якім спадарожнічала выступленне кабарэ „Відэлец” з Беластока. А вечарам усе ўдзельнікі гэтай гуманітарнай акцыі пускалі „святло ў неба” і гулялі на дыскатэцы.

Першыя валанцёры прыйшлі ўжо а сёмай гадзіне раніцы. Ад іх вуліцы горада сталі каляровымі: некалькі дзесяткаў дзяўчат і хлопцаў у чырвоных дзедамарозавых шапачках з надпісам „Вялікі аркестр святочнай дапамогі”, яркіх шаліках з чырвоным сэрцам з’явіліся ў найбольш людных месцах горада.

Анна Барэчка — вучаніца Эканамічнага ліцэя, у акцыі ўдзельнічала ўжо трэці раз (на здымку першая справа):

— Сустрэліся мы з вялікай добразычлівасцю і шчодрасцю гайнавян. Людзі самі да нас падыходзілі, асабліва маладыя, і часта па некалькі разоў ахвяроўвалі грошы. Было холадна і нам час ад часу даводзілася заходзіць у пад’езды, каб пагрэцца. Прыемна ўразіла нас адна жанчына, якая вынесла нам гарбату і пірожнае, падзякавала за падтрымку хворых немаўлят і ўкінула грошы ў скарбонку.

Дамінік Анціпаў — вучань І Агульнаадукацыйнага ліцэя (на здымку другі справа):

— У акцыі ўдзельнічаю шмат гадоў. Людзі адабраюць такія мерапрыемствы, прыхільна ставяцца таксама святары. Збіралі мы грошы галоўным чынам каля цэркваў і касцёлаў ды там, дзе збіраецца найболш людзей.

Караль Бужынскі — вучань І Агульнаадукацыйнага ліцэя (на здымку першы злева):

— Да Аркестра святочнай дапамогі людзі ставяцца як да добрай забавы. Большасць сустрэтых людзей ахвотна ахвяроўваюць грошы, хаця здараюцца выпадкі, калі нехта скажа і нямілае слова. Найбольш шчодрыя — пажылыя жанчыны і маладыя маці. У гэты дзень наглядна праяўляецца вялікая чалавечая салідарнасць.

Нядзеля з „аркестрам” для Зіновія Галёнкі, які ўзначальвае штаб акцыі, была надта працавітым днём:

— Гуманітарнае мерапрыемства ў падтрымку хворых дзяцей арганізую ў Гайнаўцы трэці раз. Нашаму штабу дапамагае моладзь, галоўным чынам вучні І Агульнаадукацыйнага ліцэя. Нашы юныя валанцёры збіралі грошы не толькі ў Гайнаўцы, але і ў Белавежы. Наведалі там усе гасцініцы і рэстараны. Шчодрымі аказаліся замежныя турысты. Аўкцыён адбыўся дякуючы спонсарам, якія на гэтую мэту ахвяравалі шмат атракцыйных фантаў. Напрыклад, „Фурнэль” перадаў тры віды мэблі, „Орляс” з Орлі — 50 вырабаў, сплеценых з бярозавых галінак.

Адкуль у вас зацікаўленне гэтай акцыяй, пытаю Кшыштафа Чарнэцкага.

— Калі чатыры гады таму пабачылі мы прамоклых дзяцей, якія хадзілі па рынку і збіралі грошы ў рамках Аркестра святочнай дапамогі, якіх адусюль адганялі і да якіх ставіліся абыякава, забалела мне сэрца. Тады мы з Зіновіем Галёнкам сказалі: „Не! Трэба гэтую акцыю арганізаваць, бо шкада марнаваць дзіцячую ахвярнасць”. І такім чынам арганізуем акцыю ўжо трэці раз.

Ужо чарговае пакаленне моладзі ўключаецца ў правядзенне штогадовага Аркестра святочнай дапамогі. Найбольш ахвярнымі валанцёрамі ў гайнаўскім штабе лічаць Дамініка Анціпава, Івону Бядулю, Маргарыту Буйноўскую, Караля Бужынскага, Рафала Дубковіча, Кацярыну Пух, Кшыштафа Закшэўскага, Анну Зыскоўскую і Дыяну Дымінскую (астатняя другі ўжо раз назбірала найбольш грошай — сёлета 414,50 зл.).

Моладзь збірала грошы ў скарбонкі, раздаючы пры тым ахвярадаўцам чырвоныя сэрцы, амаль да вечара. Пазней адбылося супольнае лічэнне сабраных грошай і выезд у Беласток. Сёлета 55 валанцёраў сабралі 17 тысяч злотых (гэта больш чым год таму). Калі б людзі дапамагалі сабе так ахвярна, як у гэты дзень, жыць нам усім было б лягчэй.