Чаму не прыедуць пагаварыць з намі?

Міхась КУПТЭЛЬ

Перад выбарамі ў самаўрады пытаў я жыхароў Махнатага, каго будуць выбіраць, пэўна нашых „хлопцаў” з Беларускіх выбарчых камітэтаў!? — Адказ быў проста шакіруючы: „На тых бандытаў-беларусаў галасаваць не будзем. Яны ж бяруць грошы ад амерыканцаў, каб нашага Лукашэнку скінуць з пасады прэзідэнта. І той, хто спатыкаецца з Новакам-Езяранскім, каб аднавіць Радыё „Рацыя”, ніколі не служыць беларускай справе”. — „А калі праводзіўся ўсеагульны перапіс насельніцтва, вы, — пытаюся, — якую нацыянальнасць упісалі ў анкету?” — „Вядома, — кажуць — беларускую”. Вось табе і на. З аднаго боку беларусы, а з другога — кандыдатаў беларускіх камітэтаў не прызнаюць за сваіх. Можна падазраваць, што агрэсіўная прапаганда, пасееная на фэстах, прыносіць немалы плён: нянавісць. А што БГКТ мае вялікі вопыт у культурна-асветнай працы — я згодны з Віктарам Бурам. Толькі чаму з такой заядлай нянавісцю выказваліся мае суразмоўцы пра сяброў Беларускага саюза, беларускіх камітэтаў, пра Радыё „Рацыя”?! Адкуль бярэцца злосць і незадавальненне? З таго, што так званая дэмакратыя прынесла самыя шкоды вёсцы? Што не могуць прадаць бульбы, збожжа і што ўсюды ашуканства? Што няма нічога добрага ў сучаснай рэчаіснасці, толькі самое зло. Толькі чаму яно, тое зло, атаясамліваецца з дзейнасцю беларускіх арганізацый розных ад БГКТ? — Ці гэта проста выпадак?

Кепска, што ў мінулым беларусы — гавару пра свядомых беларусаў — не тварылі выбарчых камітэтаў. Добра, што цяпер згуртаваліся і паказалі іншым, што існуе беларуская меншасць. А што ніхто не хоча дзяліцца ўладай — вядома — і таму ўчыніўся вялікі скандал з боку „сяброў” СЛД і іх прыхільнікаў.

З адным сцвярджэннем згаджаюся з маімі суразмоўцамі: „Калі яны, значыць, дзеячы Беларускага саюза, такія беларусы, і хочуць нас прадстаўляць ва ўладах, то чаму не прыедуць і не пагавораць з намі?” Ну і я з імі згодны. Чаму?