Трэба брацца за работу...

— Перамаглі Вы ў выбарах з запасам галасоў. На што Вы звярталі ўвагу ў час выбарчай кампаніі?

— Арганізаванне кампаніі патрабавала многа часу і сіл. Я наладзіў многа непасрэдных спатканняў з выбаршчыкамі, якія далі ім магчымасць лепш пазнаёміцца з маёй асобай. Я даведаўся ў час сустрэч аб справах, якія турбуюць жыхароў Чыжоўскацй гміны.

— Напэўна хочуць інвестыцый.

— Людзі хочуць паправіць стан дарог у гміне і чакаюць прыцягнення інвестараў для стварэння малой прамысловасці.

— У пятнаццаціасабовай Радзе засядае восем радных ад БНВК. Ці будзеце шукаць падтрымку ў астатніх радных?

— У час першай сесіі я прапанаваў радным ад СЛД-УП супрацоўніцтва, якое было б у карысць усім жыхарам нашай гміны. Трэба брацца за работу і я думаю, што не будзе спробаў разбіваць Раду. Супольна засяродзімся на праблемах, якія трэба вырашыць у нашай гміне.

— Ці плануеце ўводзіць арганізацыйныя змены ў гміннай установе?

— Хачу рэарганізаваць працу ў гміннай установе, каб жыхары гміны адчувалі, што чыноўнікі дзейнічаюць для іх дабра. Аднак змены не будуць ісці ў напрамку ўвальненняў з працы без аглядак.

— На першай сесіі былі выбраны ўлады Рады. Хто заняў самыя важныя пасады?

— Старшынёю Рады стала Валянціна Якімюк з Падрэчанаў, а яе намеснікам Славамір Галёнка са Збуча, якія з’яўляюцца раднымі ад БНВК. Сакратаром засталася Марыя Ляшкевіч.

— Якія справы лічыце самымі важнымі ў гміне?

— Хочам асфальтаваць як найбольш дарог і закончыць будову будынка, у якім будзе знаходзіцца гмінная ўстанова. Зараз Чыжоўская гміна абапіраецца на сельскую гаспадарку. Разгарнуўся таксама невялікі гандаль. Плануем падатковымі льготамі прыцягнуць у гміну інвестараў, якія створаць прадпрыемствы і дадатковыя месцы працы.

— Можа ёсць ужо першыя прадпрымальнікі гатовыя дзейнічаць у гміне?

— Паявіліся першыя асобы ахвотныя рэалізаваць у нас інвестыцыі, але рана яшчэ гаварыць пра назвы прадпрыемстваў. Вядуцца размовы пра будову ў нас трансляцыйных аб’ектаў для патрэб радыёвяшчання і тэлебачання, за якія мы атрымлівалі б вялікія падаткі.

— Былі вы кандыдатам ад БНВК. Ці плануеце звярнуць асаблівую ўвагу на развіццё беларускай культуры ў гміне?

— Выдатная большасць жыхароў нашай гміны гэта беларусы. Будзем арганізаваць беларускія мерапрыемствы і ўдзельнічаць у іх. Лічым, што актыўнае навучанне беларускай мовы ў нашых школах будзе развівацца.

— Якія яшчэ інвестыцыі будуць рэалізаваны ў гміне?

— У будучым годзе завершым будову дарогі Лушчы — Курашава. У нашай гміне многа павятовых гравійных дарог і будзем намагацца, каб павятовыя ўлады зацікавіліся іх асфальтаваннем. У наступным годзе плануем закончыць будову водаправодаў. Тады засталіся б толькі адзінкі, якія маглі б далучыцца да водаправоднай сеткі ў наступных гадах. Думаем таксама аб будове ачышчальні сцёкаў і каналізацыі ў Чыжах і навакольных вёсках. Будова разложана была б на некалькі этапаў. На гэтую інвестыцыю хочам браць сродкі з Нацыянальнага і Ваяводскага фондаў аховы асяроддзя і з уласнага бюджэту. У далейшай будучыні хацелі б збудаваць на прыгожай рэчцы Локніцы некалькі невялікіх рэтэнцыйных вадасховішчаў і арганізаваць у гміне агратурыстычную дзейнасць. Плануем будаваць пры Падставовай школе ў Чыжах гімнастычную залу, а ў хуткім часе спартыўную пляцоўку. Трэба таксама ўпарадкаваць справы звязаныя са звалкамі смецця.

— Адкуль плануеце браць сродкі на інвестыцыі?

— З уласнага бюджэту і еўрапейскіх фондаў. Ужо нават выступілі да фонду SAPARD за дафінансаванне завяршэння будовы водаправоднай сеткі. Будзем таксама браць крэдыты і пры меншых інвестыцыях разлічваць на спонсараў.

— Будова будынка для патрэб гміннай установы вядзецца ўжо многа гадоў. Як хочаце завяршыць гэтую інвестыцыю?

— Я нядаўна размаўляў з прадстаўнікамі Кааператыўнага банка, якія згодны часткова фінансаваць заканчэнне будовы гэтага будынка, каб перанесці туды сваё аддзяленне. Паколькі ў гэты будынак будзе пераведзена гмінная ўстанова, апошнія сродкі будзем выдаткоўваць з гміннага бюджэту.

— У Кленіках спынена будова вялікага асяродка здароўя. Якая яго будучыня?

— Цяпер асяродак здароўя знаходзіцца ў школьным будынку. Новы будынак вельмі вялікі і мы не зможам выкарыстаць яго на свае патрэбы. Будзем прадаваць яго і зараз рыхтуем прапанову для зацікаўленых яго купляй. Інвестараў запрашаем наведаць нашу гміну.

— Дзякую за размову

Гутарыў Аляксей МАРОЗ