25-годдзе „Дзявочых нотак”

Паўліна ШАФРАН

Восенню 1976 года па ініцыятыве Сяргея Лукашука, тады настаўніка музыкі і кіраўніка Бельскага дома культуры, створаны быў дзявочы калектыў з 9 першакласніц. На працягу 25-ці гадоў існавання склад гурту мяняўся дзевяць разоў, а выступілі ў ім за семдзесят дзяўчат, якія ў большасці сваю будучыню звязалі з музыкай.

Ад самога пачатку „Дзявочыя ноткі” прымалі ўдзел у шматлікіх конкурсах, напрыклад, савецкай ці гарцэрскай песень, аглядах беларускай песні, з’ездзілі амаль усю Польшчу. Выступілі на больш за 300 канцэртах, фестывалях у Седльцах, Беластоку, Гайнаўцы.

Артыстычным кіраўніком і духовым апекуном гурту быў і застаецца Сяргей Лукашук, які разам з Юстынай Пажазінскай займаецца падборкай і апрацоўкай рэпертуару на працягу ўсіх гадоў існавання гурту. Пачаткова „Дзявочыя ноткі” выступалі з народнымі песнямі пад акампанемент акардэона. Ад дзесяці гадоў калектыў выступае ў эстрадным жанры, а ў рэпертуары паявіліся такія песні як „Пярсцёнак”, „Караблі”, „Дзяўчынка” і самая вядомая — „Тэлефон даверу”.

„Дзявочыя ноткі”, хаця назва паказвае на жаночы гурт, мелі ў сваім складзе і аднаго мужчыну. Быў ім Ян Палавянюк, які цяпер працуе выкладчыкам музыкі.

За 25 гадоў існавання гурт успамагалі ўлады белліцэя — дырэктар Аляксей Карпюк, пры якім паўстаў гурт, цяперашняя дырэктар Зінаіда Навіцкая, Рада бацькоў.

Лаўрэаткамі конкурсаў былі і салісткі „Дзявочых нотак” — Эмілія Астапчук і Анна Хадакоўская, якія цудоўнымі галасамі заварожвалі бельскую публіку ў час фэстаў і беларускіх канцэртаў.

Сёння, так як і ў пачатку, у гурце выступае дзевяць дзяўчат, якія можна назваць прафесіяналкамі. Вялікі ўклад працы, частыя рэпетыцыі прычыніліся да таго, што „Дзявочыя ноткі” заваёўваюць сэрцы публікі, а іх рэпертуар падабаецца як старэйшым, так і малодшым слухачам.

15 лістапада бяльшчане мелі магчымасць паслухаць „Дзявочыя ноткі” ў Бельскім доме культуры. Гасцінна выступіў на бельскай сцэне гайнаўскі гурт „Знічка”, які зрабіў сюрпрыз „Ноткам”, уручаючы ім юбілейныя падаркі і жадаючы далейшых поспехаў.

Гэты асенні вечар стаў нагодай для спаткання „першых нотак”, якія прыбылі на юбілей пасля многіх гадоў расстання. Былі словы падзякі, слёзы і супольныя выступленні на сцэне старэйшых і малодшых удзельніц „Дзявочых нотак”.