Хочам увесці нармальнасць

Аляксей МАРОЗ

Спачатку радныя прынеслі прысягу, а пасля пачаліся выбары старшыні Рады. Хаця за гэтую пасаду змагаліся толькі двух кандыдатаў, то лічэнне галасоў зацягнулася і выклікала шмат эмоцый. Перамог Уладыслаў Ягела з камітэта „Наша Падляшша”, за якога прагаласавала 12 радных. Аляксандра Галамбецкага з Самаўрадавай правіцы „Еднасць” падтрымалі толькі 5 радных. Пазней выбары павятовых улад праходзілі хутка. Радныя „Бельскай кааліцыі”, камітэтаў „Наша Падляшша” і СЛД-УП завязалі кааліцыю і яе прадстаўнікі былі абраны на найважнейшыя павятовыя пасады. Намеснікамі старшыні Рады сталі дырэктар ПШ № 3 Васіль Ляшчынскі з „Бельскай кааліцыі” і Юрый Іванчук з СЛД-УП. Старастам стаў Славамір Ежы Снарскі з „Нашага Падляшша”, а яго намеснікам — Пётр Божка з „Бельскай кааліцыі”. Павятовую ўправу састаўляць стараста, яго намеснік і двух членаў: Галіна Бушко з „Бельскай кааліцыі” і Збігнеў Шпакоўскі з „Нашага Падляшша”. Сакратаром стаў Рышард Анусевіч, а скарбнікам — Бажэна Звалінская, якія не з’яўляюцца раднымі. Апазіцыю ў 19-асабовай радзе складаюць 6 радных Самаўрадавай правіцы „Еднасць”.

— Папярэдняя павятовая ўлада была вельмі недаступная і думала толькі пра сябе. Зараз завязалася кааліцыя, якая будзе прадстаўніком розных палітычных сіл і нацыянальнасцей. Хочам у Бельскім павеце ўвесці нармальнасць, каб не было падзелу на сваіх і чужых. Ёсць шанс на супрацоўніцтва дзеля дабра ўсіх жыхароў, — заявіў Васіль Ляшчынскі, якога ў мінулай кадэнцыі нават не дапусцілі да працы ў камісіях. — Радныя „Бельскай кааліцыі” будуць мець уплыў на пастановы і змогуць рэалізаваць уласную выбарчую праграму.

Стараста Славамір Ежы Снарскі сказаў, што будзе служыць усім жыхарам Бельскага павета незалежна ад іх нацыянальнасці і старацца ліквідаваць усялякія падзелы. Старшыня рады Уладыслаў Ягела паінфармаваў, што будзе намагацца адкрыць у Бельску вышэйшую навучальную ўстанову і стварыць саюз самаўрадаў Бельскага павета.