Мастацкія сустрэчы Гродна-Беласток

Міхась ХМЯЛЕЎСКІ

З Беластока на свята прыехала восем харавых калектываў: „Крыніца” і „Каласкі” з Беластока, „Прымакі” і „Расспяваны Гарадок” з Гарадка, „Васілёчкі” з Бельска-Падляшскага, „Хлопцы-рыбалоўцы” з Рыбалаў, „Рэчанька” з Козлікаў і „Цаглінкі” са Старога Ляўкова. Суправаджаў самадзейнікаў консул Рэспублікі Беларусь у Беластоку Аляксандр Карачун.

Фестываль распачаўся прывітальнымі прамовамі арганізатараў: Людмілы Кадзевіч — начальніка Упраўлення культуры Гродзенскага аблвыканкама, Юзафа Парэцкага — намесніка старшыні Саюза палякаў Беларусі і Яна Сычэўскага — старшыні ГП БГКТ, які, між іншым, згадаў Міжнародную канферэнцыю „Шлях да ўзаемнасці”, якая 24 і 25 кастрычніка прайшла ў Гродне і якая з’яўляецца мастом для супрацоўніцтва ў многіх галінах, а перш за ўсё ў галіне культуры паміж Польшчай і Беларуссю, асабліва Гродзеншчыны і Беласточчыны.

Затым сцэна перайшла ў валоданне мастацкіх калектываў. Канцэрт распачаўся пралогам: песню „Родны край беларускі” праспявалі ўсе ўдзельнікі фестывалю. А другую песню „Мой родны кут” выканаў наш ансамбль „Прымакі”. Усе БГКТоўскія харавыя калектывы адрэкамендаваліся высокім мастацкім узроўнем, добра ўспрымаліся гродзенцамі.

Аб нашых гуртах неаднойчы пісалі мы ў „Ніве” і таму трошкі больш увагі прысвячу польскім мастацкім калектывам у Беларусі.

На фестывалі выступілі дванаццаць калектываў з паасобных раённых і гарадскіх дамоў культуры і аднаго вясковага. А быў ім фальклорны ансамбль „Matczyna Piosenka” з вёскі Таневічы ў Шчучынскім раёне (мастацкі кіраўнік Тэрэса Адамовіч). Жанчыны без акампанементу прыгожа заспявалі песні: „Cichy pogodny wieczor majowy” і „Tam nad jeziorem”. Другім польскім хорам з гэтага раёна быў народны хор „Promien” Шчучынскага РДК (мастацкі кіраўнік Аляксей Міцай). Хор выканаў песні „W moim ogrodeczku” і „Czerwony pas”.

З Іўеўскага раёна калектыў „Іwianka” (пад мастацкім кіраўніцтвам Іосіфа Януковіча) выступіў з асаблівай песняй — „Гімнам трэцяга тысячагоддзя”.

Польскае асяроддзе Ваўкавыска прадстаўляў узорны ансамбль песні i танца „Jutrzenka” (мастацкі кіраўнік Жанна Шарокава) з прыгожа выкананымі польскімі танцамі.

З Воранаўскага раёна ў фестывальным канцэрце ўдзельнічаў калектыў „Zaranica” Радуньскага ГДК (мастацкі кіраўнік Аліна Булгак). Песні „Kraj rodzinny” і „Kalina w lesie” добра ўспрымаліся публікай.

Высокім мастацкім узроўнем выдзяляліся два калектывы са Слоніма, а менавіта ўзорны хор „Каmerata” і народны камерны аркестр „Arfeon” Слонімскай ДМШ (мастацкія кіраўнікі — Наталля Кукліцкая і Аляксандр Масляніцын). У іх прафесійным выкананні прагучалі паланез Агінскага „Pozegnanie z Ojczyzna” i „Przasniczka” С. Манюшкі.

Вельмі цёпла было ўспрынятае гледачамі выступленне Дзіцячага эстрадна-вакальнага ансамбля „Анжэліка” Лідскага польскага дома (мастацкі кіраўнік Анжэліка Берук). Танец „Kujawiak-oberek” і адначасова песня „Rudy rydz”, а таксама песня „Mama dobrze wie” і танец дзяўчынак быў захапляючым і ўзнагароджаны моцнымі воплескамі. Другім калектывам з Ліды быў народны вакальны ансамбль „Kresowiacy” Лідскага ГДК (мастацкі кіраўнік Чэслаў Янушкевіч). У іх выкананні прагучалі песні „Думка на выгнанню” і „У Радуні на ярмарцы”.

З Гродна на фестывальным канцэрце рэкамендаваліся тры калектывы: узорны вакальны ансамбль „Grodzienskie Slowiki” (мастацкі кіраўнік Анна Бінэрт) песнямі: „Pradziadzius”, „Ojciec Wirgiliusz”, хор „Glos znad Niemna” (мастацкі кіраўнік Віктар Адамовіч): „Niech zyje bal” і „Polesia czar” і народны ансамбль песні і танца „Chabry” Гродзенскага ГДК (мастацкі кіраўнік Элеанора Кашчэнка): „Na sobotke” і „Krakowiaczek” С. Манюшкі, а таксама саліст Андрэй Парамчук. Спявалі на выдатна.

Два гады таму я таксама быў у Гродне на такім жа фестывалі і хачу сказаць, што сёлета польскія калектывы значна павысілі свой мастацкі ўзровень, дасканала падрыхтаваліся да фестывалю польскай і беларускай культур.

Фіналам фестывалю было супольнае спяванне дзвюх песень польскай, мадыфікаванай „Piekna nasza Polska cala” і беларускай „Люблю наш край”.

Вядучымі канцэрт былі Ева Ласкевіч і Андрэй Парамчук.

У фае філармоніі можна было набыць народныя вырабы — вышыўкі, вырабы з ракіты і іншыя.

Канцэрт працягваўся больш за тры гадзіны. Пасля яго калектывы з Беласточчыны паехалі на вячэру, затым адправіліся ў напрамку Баброўнікаў. У зваротнай дарозе (таксама як і ў Гродна), самадзейнікам спадарожнічала песня пад акампанемент музыкантаў.