Выбары ў Бельскім павеце

Аляксей МАРОЗ

У першым туры выбараў бурмістра Бельска-Падляшскага перамог Андрэй Сцепанюк з „Бельскай кааліцыі”, які набраў 3 132 галасы. На другім месцы апынуўся Яўген Беразавец з СЛД-УП (2 845 галасоў), на трэцім — Аляксандр Галамбецкі з Самаўрадавай правіцы „Еднасць” (2 653 галасы) і на чацвёртым — Пётр Даніла з „Нашага Падляшша” (933 галасы).

У выбарах у Гарадскую раду Бельска-Падляшскага перамагла „Бельская кааліцыя”. Увяла яна ажно 8 радных. Сталі імі Юрка Баена, Аляксандр Божка, Пётр Кандрацюк, Зінаіда Навіцкая, Тамара Русачык, Марыя Рыжык, Дарафей Фіёнік і Мікола Хроль.

У горадзе непасрэдны выбар бурмістра не прыцягнуў дастатковай колькасці жыхароў і на выбарчыя ўчасткі прыйшла менш чым палова ўпаўнаважаных да галасавання.

У Бельскім павеце найбольш беларусаў пражывае ў гмінах Бельск-Падляшскі і Орля, менш у гміне Боцькі. У вясковай гміне Бельск-Падляшскі ў выбарах на пасаду войта перамагла Яўгенія Асташэвіч з СЛД-УП (52% галасоў). Папярэдні войт Юрый Ігнацюк — кандыдат ад „Бельай кааліцыі” — сабраў 48% галасоў. У 15-асабовую Раду ўвайшлі 5 дэпутатаў ад „Бельскай кааліцыі”: Ян Сідорскі, Ірэна Цішук, Павел Лазавік, Славамір Бужынскі і Міхал Пятроўскі.

У Арлянскай гміне ажно шэсць кандыдатаў змагаліся за пост войта. У першым туры найбольш галасоў набраў цяперашні войт Ян Добаш ад камітэта „Будзьма разам” (34% галасоў), а яго папярэднік Міхал Іванчук ад камітэта „Арлянская зямля” апынуўся на другім месцы (24% галасоў). У гміне Боцькі войтам стаў Станіслаў Дэрэгайла, які набраў 69% галасоў.

На выбарах у сеймік Падляшскага ваяводства Беларускі выбарчы камітэт набраў у Бельскім павеце 3 468 галасоў. На гэтым спіску найбольшай падтрымкай выбаршчыкаў карыстаўся Ян Чыквін (3 014 галасоў).

PS. У другім туры бурмістрам Бельска стаў Яўген Беразавец, а войтам Орлі Ян Добаш.