Юбілей калектыву „Арэшкі”

Міхал МІНЦЭВІЧ

Гасцінна выступілі калектывы з Курашава і Гродна. Сапраўдны паказ сваіх магчымасцей запрэзентавалі Юбіляры — „Арэшкі”. Са свайго багатага рэпертуару калектыў праспяваў некалькі песень: „Dzis was drodzy goscie”, „Я купіў гармонію”, „Пасеяла агурочкі”, „У нашым садочку”, „Там у полі вярба расла”, „Там у полі тры крынічанькі”.

Юбіляры, з рук віцэ-ваяводы, атрымалі адзнакі „Zasluzony dzialacz kultury”. Валянціна Ласкевіч зачытала віншавальны ліст, у якім ад імя міністра культуры Рэчы Паспалітай Вальдэмара Дамброўскага, між іншым, напісана: „Starannie pielegnujac folklor bialoruski, spiewajac piekne piesni Waszego regionu, przyczyniaja sie Panie do szerokiej prezentacji bogactwa kultury naszej wspolnej Ojczyzny”.

* * *

Калектыў „Арэшкі” паўстаў у 1972 годзе па ініцыятыве Аляксандра Лукашука, настаўніка з Белавежы. Каля двух гадоў з калектывам супрацоўнічаў Янка Крупа, цяпер „Арэшкі” працуюць без інструктара. Калектыў выступаў у Сямятычах, Драгічыне, Сувалках, Пуцку, Варшаве, Сопаце, Пуньску, Гродне. Штогод прымае ўдзел у фэстах і дажынках. За мінулыя 30 гадоў у калектыве выступала 11 асоб; цяпер налічвае ён 6 жанчын: Таццяна Гурын (выступае ад пачатку), Надзея Грушэўская (кіраўнік калектыву), Надзея Грош, Надзея Андрасюк, Ніна Авэрчук і Марыя Скепка — усе з Арэшкава.

* * *

Тыдзень пасля мерапрыемства я правёў гутарку з кіраўніком калектыву Надзеяй Грушэўскай.

— Якія задачы стаяць перад кіраўніком? Дзеля чаго жанчыны спяваюць? Ці мужы не раўнуюць у час рэпетыцый і даволі частых выездаў калектыву?

— Мы любім беларускую песню і любім спяваць. І хочам расславіць наш рэгіён, нашу гміну. Я, як кіраўнік, склікаю жанчын на рэпетыцыі перад выездамі на выступленні. Рэпетыцыі, пераважна раз у тыдзень, адбываюцца — калі халоднае надвор’е — у хаце, а летам у святліцы; там ёсць такі пакойчык. У сваім рэпертуары маем больш за дзвесце песень — беларускіх, рускіх, польскіх...

Мужы дазваляюць нам праводзіць рэпетыцыі і выязджаць з канцэртамі, бо яны таксама любяць песні. Няма ў калектыве маладых, бо яны не любяць такіх песень, а мы будзем спяваць дакуль зможам. Радуемся атрыманымі ад міністра адзнакамі і юбілейным мерапрыемствам таксама задаволены.