Дыпламаваны настаўнік

— Нядаўна сталі Вы дыпламаваным настаўнікам (як трэці ў школе). Што было характэрнае для Вашай стажыроўкі?

— Трэба было выканаць многа работы, сабіраючы ўсялякія дакументы. Кожную дзейнасць трэба было рэгістраваць, пацвердзіць пячаткамі і подпісамі адпаведных асоб. Абавязкова апісаць пазакласную работу, працу з моладдзю, поспехі ў спаборніцтвах. Неабходна падрыхтаваць дакументацыю звязаную з узнагародамі і поспехамі ў працы. Уласныя ініцыятывы ў рабоце і супрацоўніцтва з асяроддзем таксама павінны быць апісаны і прадстаўлены камісіі, якая мяне ацэньвала.

— Якімі ініцыятывамі можаце пахваліцца?

— Апрацаваў я праграму для падрыхтоўкі вучняў да экзаменаў на вадзіцельскія правы на мотаролер, выкарыстоўваючы ў ёй працу з камп’ютэрамі і іншымі дапаможнікамі. Выканаў я індывідуальную сістэму ацэнкі вучняў, прадставіў аўтарскі спосаб падвядзення вынікаў у вучобе і прадставіў яго настаўнікам. З маімі метадамі навучання маглі знаёміцца іншыя настаўнікі ў час адкрытых урокаў.

— А што можаце расказаць наконт супрацоўніцтва з асяроддзем?

— Супрацоўнічаў я з беларускімі суполкамі пры арганізаванні фэстаў і аглядаў беларускіх калядак. Трымаў кантакт з Аддзяленнем дарожнага руху Павятовай камендатуры паліцыі ў Гайнаўцы ў час экзаменаў на мотаролерныя правы. Рыхтуючы моладзь з белліцэя да турніраў супрацоўнічаў я з Асяродкам навучання вадзіцеляў „Падлясяк” і з Тэлекамунікацыйным прадпрыемствам у справе падключэння камп’ютэраў да Інтэрнэту.

— Калі пра камп’ютэры, дык як абсталяваныя камп’ютэрныя кабінеты ў школе?

— Разам з дырэктарам Яўгенам Сачко апрацавалі мы праект выкарыстання інтэрнэтавага кабінета для адукацыйных патрэб. Як адзіная школа ў Гайнаўскім павеце атрымалі мы з Міністэрства адукацыі новыя камп’ютэры і друкарскае абсталяванне. Вучні могуць карыстацца Інтэрнэтам для адукацыйных патрэб і пасля ўрокаў. У адну сістэму ўключылі мы камп’ютэры адміністрацыі і бухгалтэрыі, што палепшыла іх працу.

— Ці трэба было ездзіць на дадатковыя курсы павышэння кваліфікацый?

— Праца з камп’ютэрамі мае такі характар, што ўвесь час трэба многа вучыцца і не толькі ў час стажыроўкі я павышаў свае кваліфікацыі на курсах.

— Вы сказалі, што важная была пазакласная работа.

— Разам з вучнямі стварылі мы і вялі на польскай, беларускай і англійскай мовах школьную старонку ў Інтэрнэце. Рыхтаваў я вучняў да турніраў „Спраўныя як жаўнеры”, у якім занялі мы ІІ месца ў цэнтральных спаборніцтвах, а на Матарызацыйным турніры нашы белліцэісты занялі ІІІ месца ў маштабе Падляшскага ваяводства.

— Настаўнікі гавораць, што цяжка правільна прадставіць дакументы.

— Дакументы трэба сабіраць сістэматычна, бо праз тыдзень або месяц іх не збярэш. У мяне не было дакладных інфармацый, як трэба прадставіць усю дакументацыю і мусіў вучыцца на сваіх памылках. У час стажыроўкі не трэба здаваць экзамены, але на падставе пасведчанняў трэба паказаць усю сваю працу. Зараз плануецца пабольшыць патрабаванні ад настаўнікаў, якія хочуць стаць дыпламаванымі.

— Дзякую за размову.

Размаўляў Аляксей МАРОЗ