Ці зарасце травой чыгунка?

Аляксей МАРОЗ

— Вы нас увесь час палохаеце. Хопіць гэтага страшання, бо ад яго некаторыя пухнуць, — заявіў усхваляваны войт Чаромхаўскай гміны Міхал Врублеўскі. Прасіў ён захаваць чыгуначны транспарт у яго гміну і ў найгоршым выпадку абмежаваць колькасць пасажырскіх рэйсаў. Прапанаваў праверыць рэйкі і рамантаваць іх на кароткіх адрэзках, а пасля адмяніць абмежаванне хуткасці цягнікоў з Чаромхі ў Беласток з 30 кіламетраў у гадзіну на 50. Пасажыры, якія маюць выбар паміж павольным чыгуначным транспартам з Беластока ў Чаромху і хуткім, танным транспартам на прыватных мікрааўтобусах, а нават даражэйшых аўтобусах, выбіраюць апошнія і таму цягнікі пустуюць.

Павятовыя радныя прапанавалі падпісаць пагадненне з чыгуначным прадпрыемствам па перавозцы грузаў наконт даплат да пасажырскіх перавозаў на адрэзках, дзе перавозіцца многа грузаў. Апошнім часам праз Гайнаўку перавозяць многа небяспечных для людзей і Белавежскай пушчы прадуктаў. Аднак, дырэктар Чэслаў Суліма не развіваў гэтай тэмы, засяроджваючыся на нерэнтабельнасці пасажырскіх перавозаў. Паводле чыгуначных падлікаў, толькі 7% коштаў пасажырскіх перавозаў на адрэзку з Гайнаўкі ў Цісоўку складаюць прададзеныя білеты. Аказваецца, што галоўнымі пасажырамі (80-85%) з’яўляюцца самі чыгуначнікі і іх сем’і. На іншых маршрутах яны таксама становяцца частымі пасажырамі. Чыгуначнікі не купляюць білетаў і не павышвюць рэнтабельнасці перавозаў. Але гэта не павінна вырашаць пра абмежаванні ў чыгуначным транспарце або яго ліквідацыю. Намеснік старшыні рады Мікола Бушко прапанаваў шукаць ашчаднасцей у лепшай арганізацыі пасажырскага транспарту.

Войт Нараўчанскай гміны і заадно павятовы радны Мікола Павільч прапанаваў, што яго гміна можа чыгуначнаму прадпрыемству зняць падаткі, якія яно плаціць у гмінную касу за пасажырскія перавозы. Намякаў ён, што гмінныя работнікі могуць прыбіраць на пасажырскіх вакзалах, але гэтыя прапановы не былі станоўча ўспрыняты дырэктарам Чэславам Сулімам. У наступным годзе будзе папраўлены расклад ад’езду цягнікоў на Гайнаўшчыне, згодна з прапановамі радных (калі гэтыя цягнікі будуць яшчэ ездзіць — А. М.). Пасажырскі транспарт з Чаромхі ў Беларусь, хутчэй за ўсё, будзе зменены. Плануецца, што аўтобусы, якія замест цягніка будуць ездзіць два разы ў дзень, не будуць даязджаць да Брэста, але толькі да Высока-Літоўска.

Радныя прагаласавалі супраць ліквідацыі чыгуначных перавозаў на Гайнаўшчыне і будуць хадайнічаць перад чыгуначнымі ўладамі і Маршалкоўскай управай у Беластоку, праз якую праходзяць дзяржаўныя датацыі для чыгуначнага пасажырскага транспарту, аб яго захаванні. Старшыня рады Вольга Рыгаровіч намякнула ў канцы дыскусіі, што перад вайной чыгуначныя ўлады прыязджалі на спатканні на сваім транспарце. Калі б сёння прадстаўнікі чыгункі захацелі даехаць у Гайнаўку на цягніку, мусілі б некалькі гадзін ехаць з Беластока ў Чаромху з хуткасцю 30 кіламетраў у гадзіну, а пасля перасесціся на цягнік у Гайнаўку.