Музыкі з Гайнаўскага белліцэя

Міхал МІНЦЭВІЧ

Ад некалькіх гадоў гэты ўздым дыска-пола крыху прыеўся, паслабеў. Большасць клубаў, якія раней вырасталі як грыбы пасля дажджу, не вытрымалі канкурэнцыі і сталі нерэнтабельнымі. Бо ці ж можна масава заганяць людзей да гульні? Выжыла і трымаецца электронная музыка, усялякія сінтэзатары. Сёння маладзёжныя калектывы складаюць на практыцы двух клавішных інструменталістаў і неабходная дыскета з запісам рытму. Музыка быццам прысутнічае, але яна зусім штучная, механічная. Паводле мяне, барабаншчыка, „аўтаматычны перкусіст” толькі і тупае запраграмаваны рытм без брэйкаў (талеркавага механізму) і індывідуальных уставак і ён не можа заступіць сапраўднага музыкі. Таму лічу абнадзейваючай з’явай тое, што дзе-нідзе пачынае праяўляцца колішні характар музыкі з багацейшай інструментацыяй.

У Гайнаўцы група падлеткаў стварыла музычны калектыў, у складзе якога маем гітары, арганы, два акардэоны і акустычны барабан. Дваіх з іх ліку: Дарыюш Астапкевіч (бас-гітара) і Радаслаў Верамчук (вакал, акардэон) вучацца ў Гайнаўскім белліцэі, трэці, наймалодшы, Данель Сакоўскі — у Белгімназіі. Чацвёрты, Раман Цыбулін з Кляшчэляў, вучыцца ў Бельскім будаўнічым тэхнікуме. Пазнаёміліся яны ў час Фестывалю царкоўнай музыкі. Усе цікавіліся музыкай ад наймалодшых гадоў, бо яна складала і сямейную традыцыю. Данеля іграць на бубне вучыў ягоны бацька Сяргей, які сам іграў у шмат якіх калектывах. Ліцэісты раней вучыліся ў музычнай школцы.

Калектыў, які прыняў назву „Рэверс”, існуе год пры Гайнаўскім белліцэі, а таксама выступае самастойна. Частка інструментаў уласная, а частка — ліцэя. У сваім рэпертуары маюць не толькі сучасную музыку, але і любімыя гіты сваіх бацькоў і дзядоў. Да ігры ставяцца ахвотна і, пакуль, іграюць дармова — каб паказацца. У апошні час выступалі ў агратурыстычнай гаспадарцы „Купала” ў Арэшкаве, на фэсце ў Чаромсе, на Днях Кляшчэль. Набіраюць вопыт і ўжо радуюць публіку.