Дні Кляшчэляў

Уладзімір СІДАРУК

У суботу 20 ліпеня надвор’е не паспрыяла. Пацягвала холадам і імжэў дожджык. Спаборніцтва па плаванні на купальным басейне адтэрмінавалася. Сабраная публіка задаволілася відовішчам, якое арганізаваў асяродак культуры. Было гэта „плаванне на абы-чым”. Чарамшук Віктар Шатыловіч зрабіў адмысловы водны ровар і дазволіў на ім гуляць жадаючым. Ахвотных пакарыстацца роварам было многа. Адзін дзядуля прапанаваў нават 10 зл., каб толькі пакатацца.

Члены Таварыства сяброў Кляшчэлеўскай зямлі і жыхары мястэчка сустрэліся ў сядзібе мясцовага лесніка і заадно скульптара Яраслава Смыка, каб паглядзець ягоную галерэю, а затым перайшлі ў „Карчму ў Валентага” на банкет, які арганізаваўся за кошт удзельнікаў. Аматары танца змаглі пагуляць на дыскатэцы пры купальным басейне.

21 ліпеня імпрэза пачалася ў 14 гадзін з футбольнага турніру, а ў 15 гадзін у мясцовым асяродку культуры была адкрыта выстаўка вышываных абразоў. У той жа час праводзілася таксама прэзентацыя кніжкі „Monografia Kleszczel” аўтарства Мікалая Рошчанкі. Выданне карысталася зразумелым зацікаўленнем, паколькі адлюстравана ў ім гісторыя горада і грамадскасці ад моманту надання Кляшчэлям гарадскіх правоў па сучаснасць.

Асноўнай часткай святкавання быў беларускі народны фэст арганізаваны Беларускім таварыствам, Гарадской управай і мясцовым цэнтрам культуры. У мерапрыемстве ўдзельнічалі пасол Сейма Аляксандр Чуж, старшыня Рады павета Вольга Рыгаровіч, віцэ-консул РБ Ігар Сякрэта, паэт Віктар Швед, камендант Павятовай камендатуры ПСП Яраслаў Трафімчык і войты суседніх гмін: Дубіцкай — Анатоль Паўлоўскі і Арлянскай — Ян Добаш.

Пасля афіцыйнага прывітання гасцей і публікі бурмістрам Аляксандрам Сяліцкім, пачалася мастацкая частка. Выступілі гурты: „Ас”, „Прымакі”, ансамбль песні і танца „Стрэчанне” з Беларусі, „Каласкі”, „Rewers”, „Tursa”, „Andreans Band”, як і фальклорныя калектывы з Кляшчэляў, Дашоў і Дабрывады. Публіка не падвяла. Пляцоўка побач купальнага басейна была бітком набітая. Было на што паглядзець ды і надвор’е паспрыяла. Весела і культурна правялі час жыхары Кляшчэляў у час сёлетніх святкаванняў Дзён горада. Мерапрыемства закончылася паказам феерверкаў.