Без энтузіязму ў Еўрасаюз

Аляксей МАРОЗ

Міністр Владзімеж Цімашэвіч паінфармаваў аб шанцах развіцця рэгіёнаў каля ўсходняй мяжы пасля далучэння да Еўрасаюза ў 2004 годзе. Цяпер у Падляшскім, Люблінскім і Падкарпацкім ваяводствах паўстае толькі 12% вытворчага прадукту, пералічваючы яго на аднаго жыхара і толькі 7% інвестыцый у маштабе краіны праводзіцца ва ўзгаданых ваяводствах. Данія, якая неўзабаве ўзначаліць Еўрасаюз, прыхільна ставіцца да новых членаў, а міністр замежных спраў Даніі захоплены прыгажосцю Белавежскай пушчы.

— Дыспрапорцыя паміж багатымі і беднымі рэгіёнамі ў Польшчы павялічваецца. Еўрапейскія сродкі з’яўляюцца апошнім шанцам на развіццё падляшскага рэгіёна. Заахвочваю да супрацоўніцтва прадстаўнікоў трох паветаў, бо тады шанцы атрымаць сродкі будуць большыя, — сказаў міністр Цімашэвіч. Паабяцаў ён, што будзе намагацца, каб са сродкаў Еўрасаюза будавалася міжнародная дарога праз Сувалкі, Беласток, Седльцы, Люблін і Пярэмышль. Паводле міністра, дарога павінна стаць шанцам на развіццё ўсходніх рэгіёнаў Польшчы.

Міністр Владзімеж Цімашэвіч напомніў аб неабходнасці адукацыі працаўнікоў у напрамку прыцягнення да сваіх гмін еўрасаюзных фондаў, напрыклад, пасылаць маладых добраадукаваных людзей на стажыроўкі ў краіны Еўрасаюза. Войт Нарваўскай гміны Якуб Садоўскі расказаў пра безвыніковыя намаганні атрымаць сродкі з фонду „PHARE 2000” (надта бюракратычныя еўрасаюзныя структуры).

— Звычайнаму чалавеку Еўрасаюз непатрэбны. Дай ім 100 злотых [Еўрасаюзу — А. М.], то аддадуць табе 25. Зрабілі б пры нагодзе выбараў апытанне ці людзі хочуць уваходзіць у Еўрасаюз і ведалі б. Людзі астаюцца без працы, то што ж будзе з нашай Гайнаўкай. Тут і без высяляння ўсё зарасце лесам. Калі сёння элеватары поўны збожжа, то з-за мяжы яго імпартуюць надалей. Зараз гаспадарка ў 10 гектараў непатрэбная. Каб не дарабляў я ў горадзе, то цяжка было б выжыць, — пракаментаваў у кулуарах выступленне міністра Сяргей Кучко з Махнатага.

У наступнай частцы сустрэчы прадстаўнікі цэнтральных устаноў мелі падрабязна паінфармаваць пра сродкі з Еўрасаюза, якімі могуць пакарыстацца самаўрады. Аднак, іх выказванні былі даволі агульнымі і тычыліся фондаў „ISPA” і „SAPARD”. Самаўрадаўцаў гэтая інфармацыя не задаволіла. Наракалі яны, што складана атрымаць сродкі з Захаду, што спачатку трэба рыхтаваць праекты, загадзя выкладаць на інвестыцыі гмінныя грошы, якіх у кожнай гміне бракуе і доўга чакаць на рашэнні.

Чарговае спатканне, звязанае з уваходам у Еўрасаюз, адбудзецца ў верасні ў Белавежы.