Свята ў Войшках

Мікалай ВАЎРАНЮК

Так гаварыў айцец Рыгор Сасна ў нядзелю 30 чэрвеня ў Войшках, калі атрымаў званне „Ганаровага грамадзяніна гміны Юхнавец-Касцельны”. У гміне бальшыня жыхароў — рымскія католікі. Званне бацюшку прызналі каталіцкія радныя. Быў гэта сапраўдны акт экуменізму. Таму вялікая радасць была ў праваслаўнай вёсцы Войшкі.

Радасць была і з іншай прычыны. Мясцовая добраахвотная пажарная каманда атрымала ад гміны новую аўтамашыну з помпай і вялікім бакам на ваду. Айцец Рыгор Сасна пасвяціў самаход і пажадаў, каб ён быў заўсёды спраўны, але ніколі не выязджаў да агню.

Падарунак пажарнай камандзе, медалі і адзнакі індывідуальна пажарнікам даваліся з нагоды юбілею стагоддзя супрацьпажарнай службы ў Войшках.

— Праўда, ёсць вусныя пераказы, пацверджаныя ў апошні час дакументам, які знайшлі студэнты ў Кракаве, што пажарнікі з Войшкаў пагасілі пажар маёнтка ў Трычоўцы яшчэ пад канец ХІХ стагоддзя, за што дасталі пяць рублёў, — кажа Ян Бручко, старшыня пажарнай каманды і солтыс Войшкаў, — але мы не будзем лічыць ужо так дакладна. Тым больш, што потым было бежанства і на некалькі гадоў нашы продкі пакінулі гэту зямлю. Няхай будзе сто гадоў. Нашаму пакаленню выпаў вялікі гонар, што можам адсвяткаваць такі юбілей.

Наўрад ці Войшкі святкавалі б так урачыста, каб не актыўнасць Яна Бручко. Ён, як солтыс, старшыня пажарнікаў і радны Гміннай рады, увесь час нешта выходжвае для сваё мясцовасці. Не так даўно ў Войшках быў пракладзены асфальт. Цяпер, да юбілею, пажарнікі пабудавалі новае дэпо. А сам старшыня ў сваім варштаце перарабляў паліцыйную помпу на колах, якой разганяюць дэманстрантаў, на баявую пажарную машыну.

Свята атрымалася імпазантнае. Спачатку айцец Рыгор Сасна адслужыў літургію ў капліцы святога Міхаіла. Затым удзельнікі свята прайшлі вясковай вуліцай пад новае дэпо. Парад вёў духавы аркестр Міністэрства па надзвычайных сітуацыях Рэспублікі Беларусь з Гродна. Удзел гэтага аркестра, як і іншых калектываў, быў магчымы дзякуючы таму, што да фэсту падключылася Беларускае грамадска-культурнае таварыства. А перад войшкаўскай публікай і гасцьмі з Юхнаўца, Беластока, беларускімі дыпламатамі выступілі яшчэ гурты „Гумарэска” з Навагрудка, „Рэчанька” з Козлікаў, „Хлопцы-рыбалоўцы” з Рыбалаў, Люба Гаўрылюк і Уладзімір Іванюк, Ала Каменская і „Прымакі”.