Мерапрыемства з непрадуманым фіналам

Уладзімір СІДАРУК

Надвор’е мерапрыемству пад адкрытым небам не паспрыяла. Пацягвала холадам і заносілася на дождж. Нягледзячы на гэта купцы ставілі ларкі з цацкамі, цукеркамі, пражанай кукурузай, а піваварны завод „Ломжа” рыхтаваў столікі пад парасонамі для аматараў піва.

На ўрачыстае адкрыццё прыйшло нямнога людзей. У зале клуба пуставалі крэслы (прададзены 72 білеты). Прычына — цана білетаў (15 зл.).

7 чэрвеня прэзентаваліся Тэатр-студыя „Голас” з Украіны, „ВЗ-аркестр” з Беларусі, „Emryo” з Нямеччыны і два айчынныя ансамблі „Muzykanci” з Кракава і „Sielska kapela weselna” са Шчытна.

— Мэтай імпрэзы з’яўляецца папулярызацыя народнай культуры і песні, — гаварыла дырэктар ГОК Тамара Кердалевіч. — Таму арганізатары намагаюцца запрашаць як найбольш калектываў з разнародным рэпертуарам.

Маладзёжная фолькавая група „Гэрдан” Тэатра-студыі „Голас” пазнаёміла публіку з украінскімі даўнімі песнямі, калектыў з Беларусі выконваў беларускія балады, а „Emryo” з Нямеччыны прэзентаваў этна-джаз. Завяршэннем канцэрта было выступленне „Музыкантаў” і „Сельскай вясельнай капэлы” на забаве, якая праходзіла пад адкрытым небам побач клуба. Музыканты ігралі наперамен не ляніўшыся. „Душа спявала, а ногі рваліся да танца”, — так гаварылі пазней удзельнікі народнага гуляння, якое працягвалася да раніцы.

8 чэрвеня мерапрыемства пачалося з вялікім спазненнем ад сустрэчы ў „фолькавай вёсцы”. У першым доміку працаўнікі сельскагаспадарчай кансультацыі з Гайнаўкі пры дапамозе вясковых гаспадынь падрыхтавалі стравы і запрашалі на пачастунак у рэгіянальную кухню. За сімвалічную залатоўку можна было пакаштаваць мясныя вырабы, малочныя прадукты, маласольныя агуркі, якія падавалі з аржаным хлебам і духмяным пірагом. Вялікае зацікаўленне праяўлялі мужчыны вырабамі каваля Антоні Сідза, які на пачаканні выконваў цацкі з жалеза.

Па-суседску з кавалём рамеснік з Гайнаўкі, які прапанаваў вырабы з дрэва і сувеніры з галінак бярэзіны. Асаблівым зацікаўленнем карысталіся рэчы прыдатныя ў кухні — кухонныя дошчачкі, кубачкі і т.п. У канцы „фолькавай вёскі” сімпатычная прыгажуня рэкамендавала выдавецтвы „Цэнтра турызму рэгіёна Белавежскай пушчы” і запрашала на веласіпедныя вандроўкі па пушчы.

У калідоры клуба прэзентавалася фотавыстаўка Віктара Волкава, а пры ўваходзе прадаваліся магнітафонныя касеты і кампакт-дыскі з фолькавай музыкай.

Публіка, якой усё больш прыбывала, чакала канцэрта. А гэты зацягваўся. Першымі выступілі госці з Нямеччыны. Ансамбль „The Buskers” амаль паўгадзіны прэзентаваў звонкія песні, змест якіх прабаваў патлумачыць на ламанай пальшчызне вядучы, але не атрымалася. Толькі пасля выканання савецкай „Кацюшы” раздаліся бурныя апладысменты.

„Folkiestra Form Roznych” з Кольна выконвала курпёўскія песні. Асабліва спадабалася выступленне жаночага дуэта. Мой сусед, які сядзеў побач, пачаткова падпяваў за самадзейнікамі, а затым падхапіў сядзячую побач кабету і пусціўся танцаваць.

Выступаюць „Syrbacy” з Гродзіска-Мазавецкага. Калектыў прэзентуе фольк і „old happy jazz” з адценнем „country”, песні з Мазоўша. Мне найлепш спадабалася балада аб казачэньку Морозэньку.

Набліжалася дзесятая вечара. Калі заказалі „Yerba Mater” і калектыў пачаў строіць інструменты, пачуўся непрыемны гоман на пляцоўцы. Пенсіянер з Плоцка Анджэй Баярунец з жонкай і дачушкай адыходзілі расчараваныя, не дачакаўшыся выступлення „Тройцы” з Беларусі і „Горыны” Украіны, не ўспамінаючы ўжо аб „Чарамшыне”. „Задоўга ўсё цягнецца і балагану многа”, — кідае на развітанне сябра. Такой жа думкі былі многія чарамшане старэйшага пакалення.

Я пакінуў пляцоўку а палове адзінаццатай вечара. Пазней казалі, што тры апошнія калектывы выступалі пасля поўначы да трэцяй гадзіны раніцы. Гэта сапраўдны кашмар!

Калі я прабаваў высветліць прычыну „арганізацыйных хібаў”, дык пачуў у адказ: „Пагаджаюся, што задоўга працягвалася імпрэза (канстатавала адна з арганізатараў, якая пажадала застацца ананімнай), але не ад нас было гэта залежнае. Нам загадзя прад’явілі „захаваць цішыню” на пляцоўцы ад 18 да 19 гадзіны (у касцёле ў той час праходзіла багаслужба). Нашых аргументаў не слухалі... Па той прычыне не змаглі правесці рэпетыцыі калектывы выступаючыя на сустрэчы. Ды і спецыялісты, якія падключалі гукаўзмацняльную тэхніку падвялі — фірма так спяшалася на іншую імпрэзу, што пакінула аднаго спецыяліста, які сам не справіўся. На дадатак электрык падключыў няправільна тэхніку да электрасеткі...

А публіка наогул была расчаравана.

— Арганізатары павінны задбаць, каб грошы, так цяжка здабытыя ад спонсараў, не былі ўкінуты ў балота, — гаварыў кіраўнік самаўрада. — Трэба запрашаць такія калектывы, якія прыцягваюць публіку, а не плаціць грошы абы-каму...

У будучыні трэба знайсці кампраміс і пахадайнічаць за тым, каб чарговыя фолькавыя сустрэчы „З вясковага панадворка” праходзілі без агрэхаў.