Ніва № 26 (2407), 30 чэрвеня 2002 г.

Узнагарода мітрапаліту Філарэту

17 чэрвеня г.г. у пасольстве Рэспублікі Беларусь у Варшаве адбылася ўрачыстая сустрэча, падчас якой мітрапаліт Менскі і Слуцкі, патрыяршы экзарх усяе Беларусі Філарэт атрымаў узнагароду святога брата Альберта. Узнагароду атрымліваюць вядомыя прадстаўнікі палітычнага, грамадскага і рэлігійнага жыцця за заслугі ў галіне культуры, мастацтва, грамадскай, а таксама экуменічнай дзейнасці. Фундатарам узнагароды з’яўляецца Хрысціянска-грамадская унія „Экуменічная акцыя”. Паводле яе кіраўніка Казімежа Мараўскага і заадно старшыні журы ўзнагароды св. брата Альберта, адзначэнне павінна спрычыніцца да распаўсюджвання гуманных каштоўнасцей у сучасным свеце, у тым ліку павінна спрыяць дыялогу паміж культурамі і грамадствамі. Ідэя ўстанаўлення гэтай узнагароды нарадзілася ў 70-я гады, у 60-ю гадавіну смерці Адама Хмялёўскага, пазней званага братам Альбертам, манаха, вядомага грамадскага дзеяча, мастака, званага айцом і апекуном беднякоў, для якіх ставіў цэнтры дапамогі ў Кракаве. Ян Павел ІІ увёў манаха Альберта ў лік святых.

Узнагарода была прызнана 25-ы раз, а ейнымі ранейшымі лаўрэатамі з’яўляюцца між іншым, маці Тэрэза з Калькуты, Ежы Гедройц, кардынал Генрык Гульбіновіч, Лех Валенса, Іаланта Кваснеўская, мітрапаліт Васілій і Яцэк Курань.

Ва ўрачыстасці, апрача лаўрэата — мітрапаліта Філарэта, удзельнічалі, між іншым, мітрапаліт Варшавы і ўсяе Польшчы Сава, старшыня Парламенцкага клуба СЛД Ежы Яскерня, прадстаўнікі пасольстваў Украіны, Малдовы, Казахстана, Югаславіі, Македоніі, Балгарыі і Егіпта ў Польшчы ды іншыя прадстаўнікі дыпламатычнага корпусу.

(Паводле Радыё Палёнія і МЗС РБ, 18.06.2002 г.)