Ніва № 25 (2406), 23 чэрвеня 2002 г.

Беларусь супраць віз

Беларусь афіцыйна выказала пратэст супраць намераў Польшчы, Літвы і Латвіі ўвесці поўнамаштабны візавы рэжым. 13 чэрвеня г.г. на прэс-канферэнцыі намеснік міністра замежных спраў Аляксандр Герасіменка заявіў, што рашэнні згаданых дзяржаў „не адпавядаюць палажэнням Хельсінскага Заключнага Акта Нарады па бяспецы і супрацоўніцтве ў Еўропе ад 1975 г., Парыжскай Хартыі для новай Еўропы ад 1990 г., а таксама іншых пазней прынятых асноватворных дакументаў АБСЕ”. Віцэ-міністр сказаў, што крокі суседзяў Беларусі накіраваны на фактычнае абмежаванне права грамадзян на свабоду перамяшчэння і адмоўна адаб’юцца на сітуацыі пражываючых у гэтых краінах этнічных беларусаў (у Польшчы — 320 тыс., Латвіі — 97 тыс. і Літве — 65 тыс.), якія неразрыўна звязаны сямейнымі, культурнымі і эканамічнымі вузамі з насельніцтвам прыгранічных раёнаў Беларусі.

На пытанне журналіста Польскага радыё калі Беларусь намерваецца ўвесці візы для грамадзян Польшчы А. Герасіменка сказаў наступнае: „Калі адзін бок уводзіць які-небудзь рэжым, то другі бок пасля акрэсленых кансультацый уводзіць адпаведныя адэкватныя меры. Польшча намерана ўвесці візавы рэжым з 1 ліпеня 2003 г. Сапраўды, мы цяпер праводзім кансультацыі з польскім бокам, і мы, напэўна, таксама з таго ж часу ўвядзем візавы рэжым на ўмовах перш за ўсё ўзаемных адносін”.

У час прэс-канферэнцыі намеснік міністра шкадаваў, што з боку вядучых еўрапейскіх структур няма рэакцыі адносна парушэння краінамі-кандыдатамі ў Еўрасаюз іх абавязацельстваў у рамках АБСЕ. „Рашэнні згаданых краін, — гаварыў, — ідуць уразрэз з прынцыпамі добрасуседства і супярэчаць духу і палажэнням асноватворных дакументаў АБСЕ”. Тым часам Рэспубліка Беларусь амаль поўнасцю парвала кантакты з гэтай арганізацыяй, не прадаўжаючы віз прадстаўнікам АБСЕ ў Мінску і абвінавачваючы яе ў падтрымцы апазіцыі.

(вл)