Спеў з духам малітвы

Янка ЦЕЛУШЭЦКІ

— Літургічны спеў яднае чалавека з Богам. Праваслаўны спеў без літургічнага месца, гэта пусты гук. Спеў з’яўляецца неад’емнай часткай Царквы. У ім мусіць быць дух малітвы. Для яго душэўнага ўспрымання служыць храм, — сказаў падчас інаўгурацыі Фестывалю мітрапаліт Варшаўскі і ўсяе Польшчы Сава.

— Выступілі 34 хоры — звыш тысячы выканаўцаў з Польшчы і замежжа. Усе яны спявалі найлепш як змаглі, у духовай, царкоўнай праваслаўнай атмасферы, — заявіў айцец Міхаіл Негярэвіч, благачынны Гайнаўскага дэканата.

— Выканаўчы ўзровень быў самы высокі, — паінфармаваў старшыня журы а. Лявонцій Тафілюк. — Цешыць тое, што ўдзельнічала ў аглядзе шмат маладзёжных хораў. Маладыя людзі дазваляюць нам спакойна глядзець у будучыню, паколькі горнуцца да царкоўнага спеву.

На працягу пяці дзён сабор у Гайнаўцы наведвала многа гайнавян і жыхароў навакольных мясцовасцей. „Для мяне больш міла было слухаць выступленні прыхадскіх хораў, якія прасякнуты праваслаўнай духоўнасцю, — кажа 82-гадовы жыхар Новага Ляўкова Аляксандр Кучко, які амаль кожны дзень ездзіў слухаць царкоўную музыку. — Напрыклад, дзеткі з хору «Рамонак» з Ласінкі спявалі ад сэрца, яны ўжо праніклі ў малітоўныя песні і ведаюць, што ў іх трэба падкрэсліваць”. Такіх выказванняў пачуў я многа.

Рэзультаты конкурсных змаганняў былі абвешчаны ў нядзелю, 26 мая г.г. перад Свята-Троіцкім саборам. Тут і былі ўручаны ўзнагароды і дыпломы.

Гран-пры фестывалю здабыў маладзёжны хор з Вялікага Ноўгарада (Расія). Спецыяльную ўзнагароду мітрапаліта Варшаўскага і ўсяе Польшчы Савы атрымаў мужчынскі візантыйскі хор з Афінаў (Грэцыя).

Пераможцамі ў катэгорыі вясковых прыхадскіх хораў стаў жаночы хор Манастыра святых Марфы і Марыі ў Грабарцы. Другую ўзнагароду атрымаў хор Свята-Мікалаеўскага прыхода ў Белавежы. За добры спеў журы вылучыла хоры з Чаромхі і Гарадка, а таксама хор манахаў з Манастыра ў Яблачыне.

Сярод гарадскіх прыхадскіх хораў першую ўзнагароду журы прысудзіла Кафедральнаму хору „Благовіст” з Дарагабыча (Украіна). Другую — хору „Валынскія званы” з Луцка (Украіна) і трэцюю — хору прыхода Уваскрэсення ў Бельску-Падляшскім.

З ліку свецкіх хораў пераможцам стаў хор „Дойлідства” з Гродна (Беларусь). Хор „Чысты голас” з Мінска здабыў другую ўзнагароду. Дзве раўнапраўныя трэція ўзнагароды журы прысвоіла хору Політэхнічнага інстытута з Беластоку і камернаму хору з Пружан (Беларусь).

У катэгорыі маладзёжных хораў журы не прысудзіла першай узнагароды. Раўнапраўныя дзве другія прысвоіла хору Прыманастырскага прыхода ў Супраслі і хору Свята-Духаўскага прыхода ў Беластоку, а трэцяе „Рамонку” з Ласінкі.

Сярод г.зв. іншых хораў другую ўзнагароду здабыў мужчынскі хор „Канон” з Масквы, а раўнапраўныя дзве трэція — хор Студыі псаломшчыкаў у Гайнаўцы і хор Духавенства Варшаўска-Бельскай епархіі. Песні і напевы ў іх выкананні натхнялі, найбольш уздзейнічалі на слухачоў, бо плылі з глыбіні сэрца.

Першы гала-канцэрт адбыўся ў Свята-Троіцкім саборы. Выступіла на ім пятнаццаць узнагароджаных найлепшых хораў. Мелі яны самы цікавы і займальны рэпертуар. Удастоілі яго мітрапаліт Варшаўскі і ўсяе Польшчы Сава, прэм’ер-міністр Лешэк Мілер, міністр замежных спраў Владзімеж Цімашэвіч, прадстаўнікі канцылярыі прэзідэнта РП ды ваяводскіх і павятовых самаўрадавых улад.

Другі канцэрт прайшоў у Дзяржаўнай філармоніі ў Беластоку. Царкоўныя напевы і малітвы яшчэ доўга будуць успамінаць праваслаўныя вернікі ды ўсе іншыя ўдзельнікі фестывалю. Яны захаваюць у сэрцах узрушаючае ўражанне.