Еўрарэгіён надзеі

Мацей ХАЛАДОЎСКІ

Членства ў ім дэкларавалі гміны Гайнаўскага павета і Камянецкага, Пружанскага ды Свіслацкага раёнаў.

— У нашых абедзвюх дзяржаў падобныя праблемы: убоства, недахоп лакальных сродкаў, абмежаванні вынікаючыя з патрэб аховы пушчы, патрэба развіцця турызму. Маю надзею, што дзякуючы стварэнню Еўрарэгіёна Белавежская пушча будзе больш супрацоўніцтва ў гэтых галінах, — паведаміў ён „Ніве” пасля падпісання дакументаў гайнаўскімі павятовымі і гміннымі ўладамі і прадстаўнікамі беларускіх прыгранічных раёнаў і дадаў:

— Сама ідэя ўтварэння гэтага Еўрарэгіёна звяртае ўвагу на пэўную адналітасць экасістэмы Белавежскай пушчы і гэтых грамадска-эканамічных праблем, якія ёй спадарожнічаюць. Маю надзею, што будзе ён дапамогай у апрацоўванні праектаў еўрапейскага характару, фінансаваных з еўрапейскіх сродкаў, якія памогуць мясцоваму насельніцтву. І тут ідэя Еўрарэгіёна вельмі добрая, паказвае ахвоту супрацоўніцтва па-за мяжой не толькі Польшчы і Беларусі, але неўзабаве і рэшты Еўропы.

На думку прысутнага на ўрачыстасці падляшскага віцэ-ваяводы Ежы Паўяновіча, супрацоўніцтва ў рамках новастворанага Еўрарэгіёна будзе спрыяць „ажыўленню гаспадарчага і грамадскага жыцця”. Гайнаўскі стараста Уладзімір Пятрочук у сваю чаргу спадзяецца, што ўрэшце дзеянні з беларускім бокам будуць ладзіцца арганізавана, і служыць усёй пушчы, а не толькі яе польскаму ці беларускаму фрагменту.

— На самым пачатку мы павінны прывесці ў рух трансгранічны турызм. І справа тут не толькі ў пагранпераходзе для турыстычнага руху ў Белавежы. Гэта і супольныя інфармацыі, і прапановы, трасіраванне турыстычных шляхоў. Але фактычна для гэтага патрэбны спецыяльны пагранпераход. І гэта будзе першы крок, які ўчынім, звяртаючыся да ўлад Польшчы і Беларусі.

Міністр Цімашэвіч ужо дэклараваў выказаць згоду.

— Калі нам удасца давесці справу адкрыцця пераходу ў будучым годзе, гэта будзе поспех. Нейкія рашэнні будуць прыняты ўжо сёлета, — дадаў гайнаўскі стараста. — Пераход мусіць быць дастасаваны да патрабаванняў Еўрасаюза. Але, найважнейшае — беларускі бок не адмаўляецца ад гэтае ідэі.

Сярод ініцыятараў і думкадаўцаў заснавання Еўрарэгіёна былі Гражына Вэнцлеўская, дырэктар праграмы PHARE і эколаг Зоя Мячкоўская з Мінска. Горача падтрымаў праект консул Рэспублікі Беларусь у Беластоку Леанід Каравайка.

Пасля падпісання пагаднення ў неба ўзляцела паўтысячы паштовых галубоў.