Агляд абрадавых сцэнак...

Янка ЦЕЛУШЭЦКІ

Сёлета было што паглядзець і паслухаць. „Хрысціны” ставілі чатыры калектывы: „Малінка” з Маліннік, маладзёжны гурток з Бельскага дома культуры ды самадзейнікі з Рыбалаў і Паўлаў (з гэтых дзвюх вёсак разам 16 чалавек). Вядома, рэквізітамі былі замест нованароджанага дзіцяці лялькі велічынёю тых вялікіх. Усе калектывы справіліся з задачай паспяхова. Нованароджаных дзяцей хрысцілі то Данілам, то Паўлікам (гэта тады, калі хлопчык нарадзіўся якраз у свята Пятра і Паўла). Шматасабовы гурт з Бельска-Падляшскага праспяваў пры тым прыгожую прызабытую песню. Аказваецца, варта дабівацца да таго, што ў народнай глыбіні. Тут нізкі паклон кіраўнічцы калектыву БДК Альжбеце Фіёнік. Апрача яе ўмела, амаль прафесійна, падабралі і вырэжысіравалі сцэнкі дзве іншыя кіраўнічкі — Вера Нічыпарук з Маліннік і Лідзія Мартынюк з Рыбалаў.

Тры беларускія абрадавыя мастацкія калектывы выступілі са сцэнкай „Вячоркі”. Гэта — „Крыўчанкі” з Крыўца, „Каліна” з Дашоў і „Асенні ліст” з Гарадка. Прыгожыя колішнія песні ды жартоўныя сцэнкі стварылі вясёлы настрой. Усё адбывалася так, як запланавалі кіраўнікі калектываў: Люба Дубко з Крыўца, Зося Кердалевіч з Дашоў і Тамара Сянкевіч з Гарадка.

З вясельным абрадам выступілі на гарадоцкай сцэне „Красуні” з Краснага Сяла (у іх выкананні была сцэнка „Перажовіны”), „Тыневічанкі” з Тыневічаў-Вялікіх („Заручыны”) і „Васілёчкі” з Бельска-Падляшскага („Прыданне”). Самадзейнікі, асабліва з Краснага Сяла пад кіраўніцтвам Валянціны Марціновіч (яна шматгадовы кіраўнік), з Бельска-Падляшскага (кіраўнік Мікалай Мяжэнны) праспявалі шмат даўніх абрадавых песень. Агульна кажучы, усе „вясельнікі” добра сыгралі свае ролі. „Расспяваны Гарадок” пад кіраўніцтвам Ніны Цыванюк ды „Журавінкі” з Агароднічкаў (кіраўнічка Ніна Аўгустыновіч) захапілі гледачоў сваім выкананнем песень, прысвечаных прыходу вясны — прызабытых „вяснянак”. У „Журавінак” былі гэта „канапелькі”, а ў „Расспяванага Гарадка” — „гуканне вясны”. Гэтыя калектывы маюць за сабой шмат гадоў працы і багаты сцэнічны вопыт.

Два калектывы: „Арэшкі” з Арэшкава ды „Крыніца” з Беластока добра праявілі сябе ў абрадзе „Дажынкі”. На вылучэнне заслужыла Люба Гаўрылюк з беластоцкай „Крыніцы”. Ансамблі падабралі для сцэнак самыя прыгожыя жніўныя песні. Адшуканыя, меладычныя, ствараючыя настрой гэтага летняга земляробчага абраду.

„Цаглінкі” са Старога Ляўкова ставілі нешта новае на нашай сцэне — абрад „Талака”. Удзельнічала ў сцэнцы адзінаццаць чалавек, у тым ліку пяць чалавек выступіла на сцэне ўпершыню. Хаця вельмі хваляваліся, усё атрымалася надзвычай удала. Ігралі шэсць жанчын і пяць мужчын (ім брава за адвагу, зацікаўленне і ахвоту). Усе разам стварылі радасны сямейны настрой.

Важна пры ўсім сказаным, што на сцэне выступалі і маладыя, і старэйшыя самадзейнікі. У многіх з іх прыродны талент. Кіраўнікі-рэжысёры праявілі вялікае ўменне ствараць, а то й умела выбраць цікавыя абразкі з вясковага жыцця-быцця.

Арганізатарамі сёлетняга агляду беларускіх абрадавых мастацкіх калектываў, якія дзейнічаюць на Беласточчыне, былі Галоўнае праўленне БГКТ, войт Гарадоцкай гміны і дырэктар Гарадоцкага дома культуры. Мерапрыемства было ўдалае. Астанецца яно надоўга ў памяці гледачоў і выканаўцаў. Варта пры тым адзначыць, што ўсе-ўсе выканаўцы атрымалі ва ўзнагароду камплекты пасцелі. Як выканаўцаў, так і пасцельных камплектаў было вельмі многа. Самадзейнікі былі задаволены дыпломамі і пасцеллю фірмы „Кора”.