„Граблі” з „Думкай”

Аляксей МАРОЗ

— Ідэя выдавання свайго часопіса ўзнікла яшчэ ў мінулым годзе. Нават сабралі матэрыялы, якія дзесьці загінулі. Зараз да выдання часопіса спрычынілася размова з Міхасём Сцепанюком з Бельскага ліцэя аб застоі ў дзейнасці сярод беларусаў у белліцэях, — кажа Кася Іванюк. — У будучыні будзе больш гістарычных матэрыялаў аб мінулым нашых зямель.

Макет часопіса захаваўся яшчэ з прошлага года, а тэксты напісалі члены Клуба беларускіх спраў „Граблі” Кася Іванюк, Наталля Лемеш, Барбара Казімярук, Рафал Андрасюк і Міхась Сцепанюк з Бельскага белліцэя. У рэдакцыйны калектыў уваходзяць яшчэ Эвеліна Пліс і Малгажата Карпюк, якая дапамагала падабраць матэрыял на літаратурную старонку.

— Каб не Кася Іванюк, дык не было б гэтага нумара, бо яна сама набрала ўсе тэксты на камп’ютэры і апрацавала часопіс, — заяўляе Малгажата Карпюк.

У перадавіцы ліцэісты пішуць, што мэтай выдавання часопіса з’яўляецца падтрыманне беларускага характару белліцэя, які, паводле іх — „ідзе на спад”. Заяўляюць, што намераны, пачынаючы з сябе, стрымліваць гэты працэс. У часопісе пішуць пра дзейнасць Клуба беларускіх спраў, які заснаваны быў у Гайнаўскім белліцэі ў 1993 годзе тадышнімі вучнямі і іх апекуном Яўгенам Вапам. Больш дакладна апісваюць дзейнасць клуба з 1998 года. Звяртаюць увагу на мерапрыемствы арганізаваныя імі ў белліцэі і ў розных месцах Гайнаўскага і Бельскага паветаў. Вучань Бельскага белліцэя Міхась Сцепанюк у артыкуле „Прынамсі спрабавалі” апісвае спробы стварэння ў Бельскім белліцэі ў 2001 годзе Клуба польска-беларускіх спраў і прадстаўляе вынікі апытання бельскіх белліцэістаў. Аўтар піша, што ў Бельскім белліцэі аб сваёй беларускасці заявіла 16% першакласнікаў, 7% другакласнікаў і 10% трэцякласнікаў і затрымліваецца на праблемах, якія спрычыніліся да спынення дзейнасці клуба ў Бельску-Падляшскім. На літаратурнай старонцы прадстаўлены верш Зосі Сачко і фрагмент прозы Генрыка Гаворскага. У нулявым нумары змешчаны расказ пра дзяўчыну, што жыла ў гміне Дубічы-Царкоўныя. На падставе расказаў людзей белліцэістка апісвае паслядоўнасці нешчаслівага кахання маладой дзяўчыны, якая пасля смерці каханага 20 гадоў жыла ў зямлянцы ў лесе. Белліцэісты адзначылі таксама некаторыя палітычныя падзеі. Часопіс „Думка” цікава апрацаваны графічна, замешчаны ў ім фатаграфіі, рысункі і карыкатуры.

Тэксты ў рэдакцыю можна дасылаць па электроннай пошце на адрас: klub_hrabli@poczta.fm або pijauka@interia.pl